Zawhna tam tak a awm a, a then in ang te a awm nual bawk a, kan chhang seng meuh lo a ni ber e. Chutih rual erawh chuan zawhna rawn lut atang hian chhiartu mipui nawlpui mamawh zual enge tih te kan lo ngaihtuah thin a, mi tam zawkin kan tangkaipui tur ber ngaihtuah chungin in zawhna te kan rawn chhang thin a ni. Tun tumah hian zawhna lo lut thenkhat khaikhawm chungin issue pawimawh tak, upa lam enkawl dan kawnga inkaihhruaina lampang kan han thlur dawn a ni. Medical term chuan "Geriatric Care" an ti a, hnam fing apiangin upa leh tar chak lo enkawl dan inkaihhruaina an nei tha a, a bikin American ho hian an nei tha zual hle. Mizote hi kan khawsak phung a lo changkang ve tial tial a, thingtlang lamah pawh nise taksa rim lutuka hnathawk kan tlem sawt a, ei leh in a lo ziaawm tial tial a, mihring dam hun chhung (life expectancy) te pawh a lo sei ve tial tial bawk. Chutiang avang chuan chhungkaw tam tak, nu leh pa, pu leh pi kum upa tak tak awmpui kan thahnem ta hle a. Mahse kan ramah tar enkawlna bik "Old-Age Home" te kan la neih that tawk loh avang leh, chhungkaw tam tak chuan chutiang Home a indah chu an hreh vangin mahni inah awmpui an thlang zawk fo bawk a ni. Amaherawhchu chak lo zawk te enkawl "Care-giving" lamah hian a enkawltu "Care-giver" tam ber chu chhungkaw member tu emaw ber, training nei lo (informal care-giver) an ni ber a. Tar enkawl kawngah hian dawhtheih a ngai hle a, a hahthlak a, a tam zawk phei chu phun peih chi te an lo ni fo bawk nen stress a sang duh hle. Chutiang avang chuan a hnuaia inkaihhruaina mawl te te hi engemaw ti zawng tala in hlawkpui ngei ka beisei. 1. An mamawh hriatchian hmasak tur: Tar te hi an tar vang ngawtin an hriatna emaw common sense an hlauh kher lova. A tam zawk phei chu chak lo nih inhria, mahni insit, midang tibuaitu anga inngai te pawh an awm fo; Depression te pawh an nei duh hle a ni. Kawppui an neih tawh loh phei chuan dam chakna an nei chau duh viau; Doctor inentir pawh hi a nazawngin an duh kher lo thin. Chuvang chuan an mamawh hriatchian hmasak a pawimawh a, Doctor hnenah hruai a, enkawlna an mamawh te, chak lohna emaw damlohna engemaw tak an neih te zawh fiah a, a enkawl dan kawngah pawh Doctor thurawn mumal tak zawh chian a tha hle. Tin, kum upa lamah hian natna tam tak hi lang chhuak lovin a inthup fo a, insawiselna awm mang lova rilphir lo puak reng te, Heart Attack lo nei ru reng te hi an awm fo a ni. Doctor in enkawlna a lo chawh te hi fiah takin ziakin an khum bul bangah te tar ila, tin, emergency ah in Doctor chu phone a rem chuan (zawh hmasak a tha fo) a phone number te pawh bangah tar tel thei ila, a tangkai zual hle. 2. Bed-side care: Khum beta na an nih loh chuan a enkawl dan kawngah hian a la zia a, mahni a zun ek thiar thei lo an nih erawh chuan a dan a dang viau thung. Khumbet a na an nih chuan enkawl kawnga hautak ber chu bed-sore hi a ni fo. An chet theih loh vang te, thisen kal a mumal loh avang te in bedsore hi an nei duh bik a, back-care pek dan hi Nurse hmelhriat kan neih chuan zawh a tha hle. Tin, Diaper hman dan leh thlak dan/hunbi thlengin zawh fiah theih nise. Zun siak ngai an nih phei chuan engtik hunbi a thlak tur nge tih te zawh a, chung hunbi te chu bangah bawk tar theih nise. Damdawi ei lai an neih ang apiang pawh fiah fai takin bangah tar ila, a theih phei chuan a pek hunbi hriat nan alarm te set ila, a tangkai lehzual. 3. A enkawltu mamawh: Tar chak lo enkawl kawngah hian kan tarlan tak angin a enkawltute hi kan induat a pawimawh hle. Damlo chak lo zawk enkawl hian tha leh hun a heh a, hriselna thlengin a tuar ve thei. Chhungkua kan buai tlang tawh a, hnathawh lai nei tan phei chuan Care-Giving hi thil namai lo tak a ni. Sum leh pai lama kan tlin anih chuan a enkawl tur bik nurse rawih mai te hi a finthlak chang a awm fo. Amaherawhchu hetiang kan ti dawn anih chuan kan enkawl tura te remtihna la hmasa ila, eng vanga enkawl tur midang ruai nge kan nih te hrilhfiah hmasa zel thei bawk ila. Tlin lo tam tak kan awm a, chung mite tan chuan chhungkaw member dang te nena mumal taka hun insiamrem lawk ni thin se, enkawltu te hian chhawk an mamawh hle a ni. Damlo thenkhat chu phut nei reng (demanding) a awm theih; chutiang ah chuan kan tlin chin leh kan theih dan chin te tha takin hrilhfiah ila, damlo tam zawk chuan an hrethiam viau zel. Ram changkang ah chuan hetiang Care-giving lamah hian Volunteer Group te an insiam a, keini ramah pawh hian social institution tha tak tak - YMA, MHIP, MUP te kan nei a, Kohhran tha tak tak kan nei bawk a, Volunteer group siam te pawh hi kan tih theih ve a rinawm khawp; Kristian te tan chuan rawngbawlna tih awm tak a ni. Ngaihtuah peih te tan hei chu kan hnutchhiah dawn nia. Sawi tur tam tak a la awm thei a, heti chinah hian duhtawk hrih ila, a tul angin kan la chhunzawm dawn nia.