Dr Ka Zawhna

V huna V lo

Dr. Chawnglungmuana - Aug 29, 2022

Naupai lo chunga ei palh pawhin thi neih buai a thlen thei. Chuvangin hman dawn chuan ultrasound hmangin nau pai leh pai loh confirm phawt a, gestational age hriat phawt tur a ni.

Zawhna: Ka cousin kum 16 mi lek hi a bialpa nen an chesual a, a V hunah a V ta silova, min hrilh har vangin nau lo pai pawh nise nau tihtlakna damdawi ka ei tir ngam chiah bawk si lova, engtinnge ka tih ang le? Min puih theih chuan ka lawm ngawt ang. 

Chhanna:    I nau i buaipui hi i ti tha hle mai. Amaherawhchu inrinhlelh nachang an hre mai thin lo leh, an inrinhlelh pawha han pui thei tur an pan emaw hrilh mai ngam loh avang hian tam tak chu hun lo takah nu an nih phah fo reng a ni. Ultrasound khawl hian chhul a naubawm insiam hi a hmu hma khawp mai a, hmeichhe tleirawl leh nula uaih tawh te pawh hi inrinhlelh nachang hre lo, nau lo pai hi ka hmu nawlh nawlh thin. I zawhna chhan rual hian helam thil kaihhnawih hriat tur tul leh pawimawh te thailang tel nghal ta ila, remchanna kan lo la ve ange.

Nau pai hun chhung rei zawng "Gestational Age" hi kan chhut danah chuan an thi neih hnuhnung ber atangin a ni a, a kar (weeks) zawngin kan sawi tlangpui thin. Mahse an thi neih dan a mumal loh chuan chhut a buaithlak duh deuh a, confirm nan Ultrasound kan tih tir thin a ni. Tin, thi neih loh thut "missed period" hi an rai tihna a ni kher lo thei bawk a, chuvang chuan hmeichhia in thi an neih loh emaw neih mumal loh chuan Ultrasound hi tih hmasak ngei theih nise a tha ber. He mi hmang hian nau an pai leh pai loh confirm te, gestational age te pawh a hriat vek theih a ni. 

Pregnancy test an tih mai, zun hmanga test na pawh hi za ah za a dik vek lo va, thi neih buai te, hormones lam fel lo avang te in “false positive” a awm ve fo thei a ni. Ultrasound ah hian 3-4 weeks vel atangin chhul ah nau bawm a awm leh awm loh a hmu thei tawh a, chuvangin hmeichhia (nau pai thei rual) in invenna tel lova sex a hmang anih chuan naupai thei reng a ni tih inhria se, a thi a nei lo (missed period) emaw a hmaa a thi neih dan ang pangngai a a neih loh (tlem te, ni hnih khat lek nei te) chuan preg test bakah hian ultrasound ti ngei thei se a duhawm hle. Chi kawnga naupai hian preg test a ti positive thei a, ultrasound a uluk taka en a tul thin, emergency case anih thin vangin.

Damdawi hman chung-changah hian hriat tur pawimawh tak tak a awm a. Nau pai venna Emergency Pill an tih mai hi za ah za a thawk kher lova, sex hman atanga darkar 12 hmalam ah a thawk tha deuh ber a, a rei poh leh a hlawhchhamna chance a sang zel bawk. Tin, naupai tih tlakna damdawi (MT Pill tih hi a lar dan tlangpui) hi fimkhur a ngai khawp bawk. Kar 8 (gestational age of 8 weeks) hmalamah hman tur a ni a, chumi hnuah erawh a fail fo bakah complication, thi chhuak reh thei lo, naupai chhunzawm chunga naute insiam dik lo ang te a thlen thei a ni. Naupai lo chunga ei palh pawhin thi neih buai a thlen thei bawk. Chuvangin hman dawn chuan ultrasound hmangin nau pai leh pai loh confirm phawt a, gestational age hriat phawt tur a ni.

Adolescent Reproductive and Sexual Health chungchang hi khawvelin a ngai pawimawh khawp mai a. Tleirawl te sex leh a kaihhnawih lama hriselna ti ta ila kan hrethiam thei mai awm e. Hmeichhe tleirawl inrinhlelhna nei miah lo chunga nau lo pai ru reng hi an awm fo mai a, sawi tak angin kei pawh hian ka lo en fo mai. thenkhat chu luak chhuak, pum lam fel loh vang nih ringa endoscope lo ti hmasa te an ni fo. Chumi in a lan tir chu kan tleirawl te hian sex hman dan an thiam a, a kaihhnawih leh a ken tel, naupai, fa neih, nupui pasal neih leh chhungkaw din thlengin an hre lo tihna a ni. A dang leh ah chuan sex an hmang anih pawha him taka hman dan "Safe Sex" an hre lo tihna a ni bawk; chu chuan natna tha lo tam tak, STD, HIV etc a keng tel bawk.

Heng kan hmeichhe tleirawl tam tak hi an bialpa te'n an nawrluih vanga sex hmang ta mai an ni fova, thenkhat chu ngaihzawng te tana inphal hi a tur anga ngaihna nei an awm nawk bawk. Tlangval thenkhat hian an sawi thin a, an bialnu te sex hmanpui an tum loh chuan pa lo ("man" lo) angah an ngai letling zawk fo. Tin, inngaizawng sex hmang tam ber hi chuan Condom hi an hmang lo; hman chu "inrinhlelhna" angah an ngai zaw mah zawk bawk. Naupaia hmeichhe awm dan "pregnancy symptoms" te hi hre lo an tam lutuk. 

Chuvangin hetiang information pawimawh hi engtinnge kan pek ang tih hi ngaihtuah a ngai hle. Nu leh pa tam zawkin an fate an sawipui ngam lo emaw hreh thin. Chuvangin tleirawl te hetiang kawnga pui thei tur, anmahni hrethiam leh kawm thiam, an ngampatna "Adolescent-friendly Health Service" te hi kan mamawh tawh hle a ni. Health Dept hnuaiah hian Health & Wellness Center te leh Adolescent Clinic hi district hrang hrangah a awm tawh a, chunga duty te chu hetiang lam thiam, training chhuak an ni a, kan hman tangkai tam a pawimawh khawp mai. Sikul zirtirtute pawh hian kan student te zinga mamawh awm nia kan hriat chu heng center ah te hian refer nachang kan hriat a pawimawh hle.

Share now