Vaihlo hi eng nge a nih? Vaihlo hi hnim chi khat a ni a, hmun lum deuhah chin a ni tlangpui thin. Hnim hring chi khat ‘Nicotiana’ tih atanga lak chhuah a ni a, a tam berah chuan meizial siam chhuah nan an hmang thin. Khawvel pumah vaihlo hi sum tam tak siam chhuah nan an hman mek a ni. Vaihlo leh a tobul Vaihlo hi America ramah chuan hun rei tawh tak 6000 BC vel khan hmuhchhuaha hman tan a lo ni tawh a. Kum 600 -900 AD velah khan Mexico rama Mayan Indian ho tobacco chuan vaihlo hi lungah te kerin lung cheimawi nan an lo hmang tawh a ni. Christopher Columbos leh a thawhpuiten kum 1492 khan Europe ramah an keng lut a. India ramah erawh chuan kum 1600 vel khan hriat tan a ni. Tunah hian khawvel pumah India hi China dawtah vaihlo thar chhuak hnem ber pahnihna kan lo ni ta a ni. Vaihlo hman vanga natna thleng theite: Vaihlo hman avang hian taksa, rilru leh khawsakna ah harsatna chi hrang hrang a thlen thei a, a hlauhawm hle a ni. Taksa a vaihlo hmanin harsatna chi hrang hrang a thlen theih tlangpui te chu: 1) Cancer chi hrang hrang- ka chhung, chaw dawt, hrawk bawr, pumpui, chuap, chhul hmawr te hi a thlen nasat zual an ni. 2) Lung lam natna, Lungphu chawla thih thutna (Heart attack) 3) Pangkhing zeng thut (Stroke) 4) Thisen sang 5) Tuberculosis (TB) 6) Zunthlum 7) Chuap natna chi hrang hrang Meizial tlawn khatin I nunna minute 4-20 te in a ti tawi thei a, I dam chhung tur pawh kum 5-10 laiin a ti tawi thei dawn a ni.Vaihlo Zuk leh Hmuam hian kan lu chhip atanga kan ke ler thleng hian harsatna min siam sak thei a, heng natna tihbaiawm tak tak Cancer chi hrang hrang; ka chhung, chuap, hrawk, pumpui, chawkawng te; tin, Chuap thalo, Lung thalo, Thisen zam ping avanga panchhia, hawhhah(Asthma), TB, Inthlahchhawnnaah Pa theih lohna, Thauchhia(Cholesterol) te mai bakah hmeichhe naupai tan Nauchhiat, Naupiang hlim zanglutuk, Nuasen chhan hraitloha thithutna te leh nausen thlakim lova piang ang chite hi a thlen a ni. Tin, vaihlo hman hian mihring min ti lang tar hmain thisen a heh em em a, ti a nung thei lo a, kan taksa a rimchhe bik a, tin leh ha a bal duh em em bawk a ni.A hmuam/ei chi (sahdah, tuibur, khaini) lampang hian ka chhung, hrawk , chawdawt cancer chi hrang hrang a thlen nasa bik em em a a ni. Tin, Gutkha kaihhnawih thil chi hrang hrang ei/hmuam avangin thalai naupang zawk teah natna hlauhawm tak Sub Mucous Fibrosis (ang that hleih theih loh ahnuah cancer a chang thei) natna a thlen awlsam hle a ni.