Tin, i vânglai hian i siamtu hre reng rawh—
Ni tha lote a lo thlen hmâ leh,
‘Lâwmna rêng rêng ka nei lo ve,’
I tihna tûr kumte a lo hnaih hmâ hian.
    —Thuhriltu 12:1

Hetia hming bula ka nihna dik tak, ka title—“Tv” dah vú a la ngai reng mai hi, nuam ka tih viau vàng leh ka duh rëng vàng emaw, ka intih theih ngawr ngawr vàng emaw a ni bîk miah lo a nia u aw … A dika dik chuan, nuam tih chu khawi lam, ka mangang a nih ber tawh zâwk hi!

Beatles shoe hun lai, kekawr zawm arh hun lai leh ar báwm tiata sam kan zuah hun laia luck viau tawh kha ka ni ve a. A nihna takah phei chuan, Aizáwla taxi dum, a chung eng, ZRT phar ding pha ngat, kan khuaa Panama cigarette zu lûttu kha ka ni ve thìn. Supply phura Mizoram dung leh väng kan hrùt lai phei chuan, ka dai chin khaw tin deuhthàw khân, ‘Kan khuaa nula zen chíng chhuaktu i ni,’ te min ti ve hial thìn!

Val luck “thìn”-a chu!

Chewing gum pawh “Ching gam” a nih lai; Pu A Sawihlîra buatsaih páwl thum/páwl li Science zirlai bu, phêk tìr vei lama, “Science chu a tiha tih a ni,” tih inziah kalhna lehkhabu kan zir lai atang tawh khán, sawi hat kai khawpa luck kha ka ni tawh a. Ngaihzáwng emaw star emaw nei miah lo mah ila, kan khuaa bialnu nei zawng zawng khân min thîk ve ringawt zêl!

‘Ka hmél hi a tha,’ chu ka inti hauh lo; mahse, ka pa hi khaw khat pa hmel tha bera sawi a ni ve thìn. Kan khaw nuho chuan, ‘Hmélah hi chuan, i pa hi i khûm chiang ngawt mai!’ te chu min ti ve thìn. Ka mood off cháng te hian dárthlalangah ka inen ringawt zêl—ka thaw ipik a zia huai thìn!

Engati nge, ‘Jon Bon Jovi i ang,’ min tih kher thinna chhan te kha ka hre thiam thìn lo. Tùn hnua kan khuaa ka hàw leh cháng hi chuan, ‘Ronaldinho i ang,’ min lo ti tawh! Ronaldinho ang nih nawm lohzia chu ka hre thiam tawh—nuam lo tak a ni! Hmàn ní lawk paw’n, vai thîr chhe zawng pakhatin, ‘Ka pi, tir sia awm em?’ tia mi’n zawh khanglàn chu le! Ka vaw hrep lo kha a vànnei ngawt mai!

Jon Bon Jovi ang min ti chiah lote paw’n, Roberto Baggio ang min ti hräm thìn. Chûng lai chuan, ‘Ol lak het’ tia “tawih” ka koh, tù mah ka kianga lo kal duh lo an awm ngai lo thìn kha a ni a. ‘Keimah maw!?’ tia mak tiin ka koh loh pui pui chenin min rawn pan hut hut zêl—boruak tha hìp tùr nei zo lo dáwn dáwn khawpin min bàwm chiam thìn!

Kawasaki Bajaj, ZRF 2xx ka nei thìn a; mahniin ka chuang ngai lo. Ka sam a sei thìn ka tih tawh khi, sam sei ve ve kan chuang thìn! A hnuah Supply buhfai kan han phur a. TMB emaw Swaraj Mazda emaw pawh ni se, a steering ka vawn tawh chuan, “Steering king” min ti thìn. Khaw luh hma kawi hnih thum vêl atang hian vawi thum vêl horn ka’n hmet tút tuar tuar a. Kan luhna tùr khuaa nula awmna in tin deuhthaw hian chaw min lo chhuansak nghâl suau suau tawh mai thìn a! A eina tùr berah ka buai letling fo. Luck leh lutuk pawh kha a lo nuam ber lo, mí vùivaina siam tam a awl!

“Tawih Magnet”

Kekawr zawm arh hun laia tlangvál tan tawh kha Jîn kekawr tight theih tàwpa tight, thisen zám lang bawl tuak thei khawpa tight-a kan hâk thin lai khán ka la tlangvál tho a. A hnu fé-a a arh an chìn thar leh hnu leh, a parallel an chìn leh thleng … leh vawiin thleng hian, ka la tlangvál chhunzawm zêl a …

Jîn kekawr tight hâk kha chu nalhpui aiin hahpui kan tam zâwkin ka hria. A hâk lam kha chu a tih dàn dàn a awm a; a phelh dànah mawlh khán a ni harsatna kan tawh nasat thin ni. Kan hâk mai theih kha kan phelh mai thei tawh thìn lo a! Thlasik laia tui luma inbual tum ve cháng pawh khán, bàltína tui lum kan chhùn luh vek tawh pawh kha, jîn kekawr phelh tuma kan buai chhúngin a lo dai leh hman vek tawh thìn a, tui vawtin kan inbual leh nge nge thìn!

“Steering king” ka nih lai phei chuan, tàwnzau dàr bahna ka’n suih báwk ngei a. Bandana ka’n hréng bawk a. Jîn kekawr hnung ipte-a thla bial lai ang papa Golden tobacco ka’n ah bial pup tawh chinah phei chuan, “Tawih magnet” ka ni ringawt tawh thìn!

Vál daw heh pahnih!

Sunday tlaia Ramthar Tláng véng, “Love tláng” kan tih thin (tùna Roman Catholic hmun)-a nula fawr-pui hmaa zu inna tùr pawisa ka neih daih loh cháng pawha nula hausa deuhte hnêna sneakers khing chauh pawh hralh thei kha ka ni thìn a. In-dos-pati-naa Sangha tín inchàwi cháng pawha ár khai häw nawlh thei ka ni bawk thìn. Tharuma ka ngam lohho zíngah dâwt sawia ngam loh pakhat mah ka nei ngai lo; tin, min ngamtu pawh tù mah ka la tawng lo—ve tlat maiin!

Aizáwla kan pèm hma, kan khuaa kan kan awm laiin tum khat chu, kan khaw thenawmah zualko tùrin min tír ve ngawt maia lê—min tírtute an inchhïr teh asin! Awih hlawm hek lo! Ka kalpui, ka thianpa kha ka kawm ngeih ber mai, kei aia daw heh leh chhäwng, thianpa Lalthanmawia a ni a! Mahni chauh chuan kal ila min awih ve mai ka ring; mahse, ka mal kal si lo a … Ka kalpui lah ka dâwt sawipui thin, ni léng lénga dâwt hlïra ka tìtìpui theih mihring awm chhun a lo ni kher bawk si. A hahthlâk duh teh a nia!

Tum khat Lalthanmawia hi kan nula rìmnaah a insawi thei uchuak pek a. ‘Khawfïng chat lai ka hmuh tum kha chu aw …’ a ti thla rawk a. Nula pa-in, ‘Chu! Engtin nge a awm a?’ a ti ta si. Thanmawia chuan hniak phawi eih loin, ‘A ri dur mai—rei lo të,’ zu ti ngawt pek a!

Mahse, thianpa Thanmawia kha pa rilru tha deuh mai a ni thung. tum khat pawh, Lalmuansánga nèn an insual a. Muansánga’n a hneh si lo. A síra a thingfâk hmuh remchàn hmasak ber a la lawk a, vuak a tum ta mai. Lalthanmawia chuan, ‘E khai! Insualna mai maiah a thinrim maw le!’ a ti duh chauh!

Biak ina kan pahniha kan inkhâwm dun ve tum paw’n Spy emaw te hi min lo ti vêl! Kan inkhâwm ve dáwn tih an hriat lâwk cháng phei chuan, thawhlàwm hlan laia meng ru tùr, pulpit síra thu zínga mi an inruat lâwk hial thìn!

Tûnah erawh …

Tûnah hian ka hmél hian Undertaker-a hmél a iang zo ta nge Papa Shango-a inhnawih ráng hmél zâwk, nulaho hi an hla dâwrh vek tawh a, ka kiangah hian an ti dék zo vek tawh! Kan star ve deuh ten, fa la nei hawt si lo hi, ‘Pa Zir,’ min tih tlat tawh chinah chuan, mi dang en loa mahni inen fiah ka ngai tawh tih ka inhre thiam ve ta.

‘Kháwl thil rêng rêng, a chhuak thar apiang a tha zêl,’  tih te hi chu tih mai mai a ni; nula deuh hi a nia tha zêl chu—chhuak thar rau rauah! No sa-in an rawn piang a, an nuten an duat no zui a, an lo tleiràwl chho a, an inuluk tulh tulh a; tin, an lo no zual deuh deuh a … Nl. U Laltha-i te ang—a páwl kaw kum thum beih nawn kuma amah rìmtute laka “Vawih barh case” lo awrh daih tawh; tùna kàng thelh motor tlàn lai pawh phar ding ngam ngat tawh chin; a ngal hmul pawh tuak vek tawh ang saw an ni ve lo aläwm!

Keini ang kum tawhah, pen tui rimtui ngata love letter ziak ve hman loho rîm rìm a mawi tawh lo a; pen friend nei ve hman lo chhaih chhaih rual pawh ka ni tawh hek lo!

A pawi bera chu: ka vàng lai, ka luck vàng lai tak maia min siamtu ka lo hre reng lo kha a ni! Tûnah, ka tána ni tha lo ka hma chhawn ta dèr mai a, “Làwmna rêng rêng ka nei lo ve,” ka tih hun chu a lo thleng ta mai si! Pathian thute kha hre zul ringawt lo khán lo zàwmin lo nunpui ta zâwk ni ilang chuan, duh loh chen chen ka tlangvál bîk tawp nâng! A tak ram vàr-pawh tak tak mang si loa consellor hnial dang thei nih te kha intih theih nána hmang loin thlarau bo zawn nán leh a ram leh a felna zawn nán ten lo hmang ve ni ila chuan, “Tlangvál dam rei” min ti reng bîk tawp lo ang maw le …