Chhan hrang hrang vanga Village Council leh Local Council term pawh sei a nih hnuah State Election Commission-in ningani (29.4.2015) khan Mizoram hmun hrang hrangah inthlanna buatsaih ta a. Tum dang ang bawkin Aizawlah chuan boruak dai tak hnuaiah inthlan a ni leh a, MPF din hnuah hian inchirh thehna leh inbeihna mawi lo tak tak awm thin kha a ziaawm ta khawp mai a. Tunhmaa kan hriat thin zan vak tih te, tawngka leh thuziak dengkhawng tak taka inbeihna te, chawei khawm dur dur te, inthlan ni tlai lama zu rui buai te, pawisa beisei a candidate-te zim buai vak ang chi kha a reh ta viau mai hi a lawmawm khawp mai. Tum dang ang bawkin inthlan result-ah hian party lianten lawmna tur an hmu leh vek a. Chutihlaiin, lawm rau rauah pawh Aizawl khaw chhunga Local Council inthlan result hi congress party tan a lawmawm zualin a rinawm, tunlai politics boruak han thlirin kum 2012 inthlan aiin seat 10 in an la tam zawk hrim hrim pawh hi an tan chuan a chanchin duhawm a ni ngei ang. Mizoram pumpuiah pawh hma an sawn a, seat 303 an la a, eptu party lian MNF in 165 an la thung. Sorkar hmalakna thenkhat sawi leh sel hlawh tak tak tunlai hian a tam a - zu zawrh hlim chhawn a nih vang te, dodalna kara school tan hun sawn hma a nih avang te, sum harsat vanga sorkar tal buai lai a nih vang te, sorkar hmalakna lian ber NLUP a tawp dawn hnaih avang te leh thil dang dang vangin eptu party-te an phur ru viauin a lang a, chak viau tur pawhin an lo in ring deuh bawk niin a hriat. Mahse, chutiang karah chuan ram pum huap pawhin rorel lai congress party (leh an thawhpuite) bawk an che tha zawk a, eptu party lian ber MNF lam hmai a uang vak lo thung. Tunhma atangin VC/LC inthlan hi chu party dinhmun dik tak hriltu a ni ngai meuh lo tih hi politics virvel thlir thinte sawi dan a ni a. Party te zawkten mal din ai chuan party lian thawhpui an duh thin a, khawtlang hruaitu inthlanna a nih avangin party bing ang zawnga kalpui hleih theih a ni lo bawk a, a lian zawk pawhin thawhpui neih a hlawk tih hriain an inhawng viau thin. Khaw hrang hrang leh veng hrang hrangah MNF leh Congress em chu an thawk dun thei lo a ni mai a, anni pahnih tih loh hi chu an thawkho thei vek a ni. Chubakah, party hrang hrangte pawh hian unit/group hruaitute thuneihna an pe zau bawk a, tangrual party an inang lo zung reng a ni. MLA leh MP inthlanpui leh VC/LC inthlan a danglamna chu a bial a zim avangin party aiin mimalah a innghat nasa hle a, chhungkaw hung, vua leh vang ngah deuh tan tlin theihna chance a sang bik hi a ni. Mi hmingtha, mi ngainat hlawh, nu fel tak leh pa fel tak vawrh chhuak te leh khawtlangin an ngaihzawn rawn tur mi, politics-a inhmang ngai lo pawh nise, sawm chhuakten an hlawkpui thin. 2012 inthlanah leh tun tum inthlanah pawh hian chutiang inpawt fan thei deuh party, vote hui thei tur sawm chhuaktu chu an che fuh tlangpui. Chutihlaiin, veng/khawtlang bil chauh a huap inthlan a nih avangin party unit buai leh hruaitute inkara neuh neuh awmin a nghawng na duh viau thin a. Tun tumah pawh hian party inawp fel leh discipline nei tha congress-in hma an sawn hi a awm viau a tih theih. Mahse, he inthlan result hi tun dinhmun a Mizoram politics darthlalang erawh a ni lo. Kan hriat angin tunhnai maiah pawh VC/LC inthlan hian MLA leh MP inthlan a hril ngai lem lo, chutiang bawkin MLA leh MP inthlan hian khawtlang hruaitu (VC/LC) inthlanah hian nghawng a nei bik lo. Fiamthu a an sawi ang deuhin V.C/L.C inthlanah hi chuan politics a inrawlh tlem zawk fe a ni. Hmun hrang hrangah independent candidate an tlin nual atang pawh hian inthlan dang nen a inang lo tih chu a chiang. Chubakah, politics-a thupui hla puia kan neih thinte pawh hian awmzia a nei vak lo ti pawhin a sawi theih ang - kum 2012 ah NLUP vanglaiin MNF an che tha hlauh a, a hma kum 2009-ah pawh sorkar hlim te, MNF tlakchhiat vanglai, an ngui lai takin an che tha phian bawk. Tunah pawh zu zawrh chungchang te, school tan hma chungchang te, MPSC chairman leh member ruat chungchang te, sum harsatna namen lo chungchang te hian inthlanah nghawng a nei lem lo tih a lang reng. Social media lamah chuan party mi leh sa thenkhatin VC leh LC inthlan result-ah hian zu khap hi mipuiin pawi kan lo ti tak tak lo, kohhran pawhin zu a do tak tak lo kohhran hrang hrang hmunpuiah pawh congress an tling tih te an sawi nasa mai a. Mahse, a chunga sawi tawh ang hian party feeling aiin mimal buk a rit zawk a, vote thlak danah pawh party ideology leh policy ten kawngro a su lem lo. Vote chhiar thinten an hre chiang zawk anga, khawpuiah hi chuan a tlangpuiin mipui nawlpui hi chuan an mi duh zawng (party hrang hranga mi) an thlang kual diat diat thin, chu chu inthlan result-ah pawh a chiang viau. Chubakah, party rilru pu lo, tha tih zawng vote thin (swing voters) hi an lo tam khawp mai tih chu MLA inthlan leh nikuma MP inthlan leh tun tum inthlannaa a polling booth hrang hranga vote party tin vote hmuh dan han khaikhin hian a hriat khawp mai. Kum tawp lamah AMC inthlan a ni leh anga, chutah pawh chuan LC inthlan a vote thlak nen hian a dang leh daih mai ang. V.C leh L.C te dinhmun leh an mawhphurhna hi a pawimawh viau rualin mipui lam hi chuan kan phut na vak lo deuh niin a lang thin, an tan pawh hming chhiat leh hming that kar hi a zau lo khawp mai. Gas buaipui peih deuh nise, veng chhung kawng tha se, street light eng tha se, chutiang ang thil dangte chu buaipui peih se an hmingtha a ni mai awm e. Tun tum Village Council leh Local Council inthlan hi Mizoram politics chanchin a chhinchhiah tlak a ni dawn a. Hmeichhe seat hauhsak (reservation) hnua inthlan vawi khatna a nih bakah term thar kum 5 atana inthlan hmasa ber a ni bawk. Hmeichhe seat hauhsak chungchang leh an hun chhung (term) rei zawng chungchangah hian mipui ngaihdan lak ni lo mahse, tul ti lem lo ve ve an tam zawkin a lang. Thingtlang lam tan chuan V.C hi an pawimawh hle a, khawpui angin sorkar lamin an vil tha hman lo a, an bialtu MLA te pawh an vil reng thei lo bawk a, khawtlang thil pawimawh buaipuiin an hmanhlel viau thin a. Chuvangin, kum 5 chhung V.C/L.C nih hi chu a rei lam deuh chu a ni, a bikin hmeichhe tan chhungkua a nghawng avangin a buaithlak maithei.