Mission Veng hian danglamna tak a nei. Tlangnuam lal hnen atanga Mission sapin Cheng 100/-a an lei a ni. Chuvangin mission ram chinah chuan Lung a chunga M chhut kuau hi an ramriah chuan an phun thliah thin. Chuvangin, Zosapin an control tlat bik a. A chhunga an phalnaa in nei reng reng chuan choka hrang a nei tur a ni. Chubakah dailen in (pit latrine) a nei ngei ngei ang a, tho luh theih loh turin vuta an phul hnuah a chhin phui tak an nei tur a ni tih a ni. Ka pa, Ch.Pasena leh Pu Lianhranga te chu khawtlang inenkawlna lamah mawhphurhtuah an dah a ni (ka hriat ve phak chinah chuan). In 70 aia tam awm an phal lo. Tin, khawpui awm man Rs. 3/- kum tina chawi chu an awl thung. Zosap ram a nih avangin an mi leh sa an dahna a ni. Zu in emaw, kohhran dan baka awm emaw chu an hnawt chhuak mai. Kei ngiang pawh hian chuti ang hnawh chhuah chu 2 ka hria. Mahse, kum khat chhung a nia, an sim chuan an la lut leh mai. Pakhat chuan a fanu thi kaihthawh a tum a, phum a phal lo a, an buai nasa. A dang chu - Venghluiah Savun kût a lo va hmang a ni awm e!

Ngawivung ruam kan tih tak (Biak in thlang) hi a hma chuan Mission Venglaia Khrismas/Kumthar hmang vek thin an ni a, in 10 emaw lai an awm ve tak avangin a hrangin an Khrismas ve ta a; mahse, an zai tlaivar zo ve lo a, an tlem tham em avangin. Pu Sai butua (Lord Robert) khan, an reh hma em avangin NGAWIVUNG RUAM a vuah a, an pu hlan ta mai niin a lang. Biak in thlang dawr thla khu, a chhak lam (chhuka vei lam) a awm ngai lo. Republic (1950) rah vek a ni. Mission Veng bik chin chu. Zosap kha, an ram lei ngei a ni bawk a, fet tak an ni. Inkhawmnaa an hmuh khâtte kha an len chilh mai zel nia.

Dam Veng leh Thakthing Veng (Rahsi Veng) ka la bak a. Dam Veng saw 1934/35 vel khan Mualpui lo halin ram a rawn kang zel a, an veng saw a kang fai leng mai. A kan zawh hlimah ka pa nen kan kal a, U Kutliani leh U Thangchungi te unauin ka pa an kuah a, an tap zawih zawih lai hi ka mitthlaah a châm reng. Thakthing Veng kan tih tak saw Rahsi Veng tih a ni thin. Kan pian hma deuha Bawrhsap thinrimin Venghlui (Rahsi venghlui) atanga a rawn sawn veng a ni. Rahsi Veng tih chu Thakthing Veng tiin a lo inthlak ta a ni.

Dawrkai Veng in tawp ber thin chu Pu Sapa (Sapthaua) a ni, chuta tang chuan khamphei saw a ni mai. Kulikawn a ni leh ta mai a, saw pawh saw, kan hriat phak ve hmaa kuli (porter)-ho innghah khawmna a ni an ti. Kulikawn hnuai, Mission Veng ep lam saw Khasi Veng tih a ni. Mistiri (lung lam thiam) an awm thin. Khasi - Usita te, Baha te, Umera te an awm thin. Kan tuikhuah pawh khi Usita min remsak, tun thlenga la hman theihin a awm. Chung lai chuan PHE awm hek lo, tuikhuah neih kha a hlu em em a ni. Chuvangin, Kulikawn Dam tuikhur pawhin hla nalh lutuk, “Dam tuikhura inbual ka phâwk nia le. Ngaih tha fêtin silk pawnfen a hlim a, Biahthudi pawh kim te’n a hril bawk a, phâwk loh hawnin a hawng zuk nia le,” tiin.