Kár hmasa khán thîr chhe zawng A-Team-ah kan tàwp a nih kha. An inkhelh hman tawh kan ring thup maithei. E khai! Chhiartute lo hmanhmawh thawt thawt teh suh u.  Inkhelh a la hnai lo nasa mai! Sawi tùr tûl dang a la tam lutuk. Kan sawi hmasa leh phawt dáwn…

Kawr Ruam leh Fîld Lama Mi Turute

Inkhelhna fîl aia thîr chhe zawnna fîla dár hmu fuh thei deuh Terama hi zui kan inchuh deuh ziah. Amah hian a duh viau lo; hralh dáwna mahni zawn hmuh anga insawi thiam kan tam thin vàng a ni. Ani hi sikul kawtah chuan inkhelh thiam tak a ni a; a chhan chu páwl thum bang number 2 a hman thiam êm vàng a ni. Bang rin tùr awm lohna tual lai leh fîl lamah chuan fak a phú viau ngai lo.

Kinlova hi inkhelh lama ball thiam tak ni mah se, thîr chhe zawnna kawr ruamah chuan a ball thiamna kha hman tangkaina a awm miau tawh thìn lo a, a ropuina mual a ni lo fo. Tin, thîr chhe hralhnaa a man tláwm ber plastic chhar ngah páwl a ni ziah. Kei aiin a ú a; mahse, min duhsak thei hle.

Maringa nèn hian thîr hmuh theih lamah chuan kan tha; mahse, football fîlah chuan a huai lo páwl kan nih avàngin bêk (back)-ah min tlàntír ziah. Lalthana lah hi, hnap sût reng chunga alluminium chhar thei deuh mai a ni a; mahse, inkhelhnaah leh vi-de-aw ennaah a che ropui viau ngai meuh lo—ball lum ûmah chiah a tha. Vi-de-aw ennaa vawih a chìn avàngin tum thum lai in neituten kan vaiin min knock out phah tawh! Mahse, thian atangin kan bàn phal lo; tape an neih vàng a ni ber ang!

Goal véng aia ipte vénga tha êm êm Nghâka hi a rinawm bur mai a. Han huai deuh phei se chuan a pian atang rêng rêng pawh hian si ban nghâk atána awhawm a tling—Nghâka hi chu.  Thîr chhe zawnnaah ràngva zawnna mual lama hma la deuh bîk thìn tùra kan ruat deuh ziah a ni. An khua Sialhâwka an awm laia an thenawmten a kawrlum vár hnunga number 10 an chhutsak hi inkhelh dáwn apiangin a rawn ha chhuak ziah thìn. Kan páwla number inchhu kawr nei awmchhun a ni nâ a, fîlah erawh a lût ve ngai mang lo thung. A kawrlum lah hi a neihna a rei ngang tawh mai a; 86 World Cup, Maradona làr tak tak laia an thenawmpa chhutsak daih tawh a ni àwm e. A chhíng tui tawh lehnghâl! A lái a lang thei hial tawh nachungin inkhelh apianga a kawr hman thiam a ni ve tlat—a khèl pha khát mai pawh a.

Rualthana hi U Kima hnung zui chawt a ni a, fîlah pawh a bulah a tlàntír ziah thìn. Tin, U Kima meizial bung ahsak thìntu ber a nih avàng ringawt pawh hian kan team hian kan thîk deuh vek.

A dawih ber a nih miau avânga kan goali (goalkeeper tih kan la hmu chhuak ve lo!) kumhlun, Thana pawh hian inkhelh apianga goali ziah hi, sawi chhuak ngam lo mah se a ning ve tih kan hre vek. Mahse, ‘K Káwla i ang,’ kan ti ziah a, a phun ngai bîk lo—a phun ngam loh vàng chu ni tho bawk mah se. Kan fuih phùr avàng nge a chhúngten an thin fuhsak vàng zâwk, nge goali kawr atán a ti hrim hrim ni, kan vénga cooker chhe siama rawn service thang U Mánga kawr hlui ni àwm tak, a hnung lama ‘Xiang Xau Fung’ tih chiang zeta inziak hi a rawn hâk chhuahpui ve ziah bawk.  Chutih rual chuan thîr chhe zawn lama mi tangkai tak a ni tlat a; Nghâka aia goali dinhmun, first goali nihna pawh chang thei a ni.

Inkhelh Hma Boruak

Chhùn dár 12 pelh hlekah thîr chhia chu kan hralh ta. Chéng 6 leh duli kan hlawh. U Kima’n, ‘Pawi lo, Sikul-II ten chéng 5 an thawh ve ang a; chéng 5-chéng 5 kan inbâwt dáwn alãwm,’ a tih avàng chuan thîr chhe zawn chu kan chawlhsan ta a. Kan palaite pahnih, Lalthana leh Rualthana te chu kan tum tùr team te be tùr leh Mithuna kaset hawh nghâl tùrin kan tír ta a.

Inkhèl tùr chuan fîl lam kan pan ta thám thám mai. Rei lote hnuah kan palai pahnihte pawh chu an rawn thleng ve thuai bawk. Kaset leh an pawisa hman bãng chéng 1 leh duli-a an lei, ching gam pathum chu kim biaiin U Kima hnênah chuan an hlàn thlap. U Kima bawk chuan lehlam páwl team kapten chu a ko a; kan inchuh tùr cup—vi-de-aw kaset chu a entír thlap. A va’n fêr (fair) tak êm!

Sikul II-ho chu an rawn thawk rip viau mai a. Ch-Sing ball-boot bunte an awm! Ngal káwr nei pawh an awm maw le! Mahse, chutianga Ch-Sing ball-boot rawn bunte chuan an úte tã an rawn thawh chhuahpui tih a chiang—an thàwl êm êm dànah. 

Kan kapten U Kima chuan Bruce Lee leh Arnâwla te anga rilru huaisen put a pawimawh thu min hrilh báng lo a; rilruin kan ngam ve êm êm ringawt. ‘A khelhah hneh lo mah ila, tharum leh tawngkamah kan hneh tùr a ni. Goal khung ve miah lo mah ila, an mahni’n si sàwm pawh khung mah se kan chak zâwk tho tho tùr a ni!’ tih chu kan team innghahna, kan thupui, kan theme song a ni bur mai!