Politics hi hrilhfiahna chi hrang hrang a awm a, Greek tawnga Politikos tih hi khua leh tuite (khawpuia chengte) kaihhnawih thil sawina atan hman a ni a; a tobul atanga sawifiah dawn chuan politics chu khawpui (ram pakhat) a chengte kaihruai tura an rilru hmin dan leh an rilru hneh dan tihna ang deuh a ni a. Tunlai hunah chuan sorkar inrelbawlnaa thuneihna chang tura hmalakna ti pawhin a sawi theih anga, sorkar siam tuma party hrang hrangten an beihna ti pawhin sawi ila a chiang tho awm e. Mi thenkhat chuan, 'Lal Isua pawh kha a hunlai khan politics lam hawiah a inhnamhnawi em ni?' tih zawhna an zawt thin a. Chhanna pakhat chu 'Isua kha politics leh pawl dangah a inhnamhnawih lo a, party pawh a din lo a, politician-te tih danin amah zuitute nen thuneihna an chuh hek lo. Mipuiin an hnam chhanchhuaktu atan leh sorkar ropui tak din tura an beiseina zawng zawng pawh a hnawl vek zawk,' tih a ni ang. A hun laia ram hruaitu, Kaisara te, Pilata te, Heroda te leh sakhaw hruaitute hneh emaw an rilru hminsak emaw a tum ngai lo bawk. A lehlam zawnga thlir thung chuan Isua rawngbawlna zawng zawng kha politics kaihhnawih thil vek a ni, a tih theih tho. Pathian ram a lo thlen thu a puang a, amah ngeiin Pathian ram a din a, a zirtirna hrang hrangte pawh hi politics thil nena inzawm vek a ni zawk. Kristian sakhuain hma a sawn tak tak hnuah phei chuan sorkar inrelbawlna (politics) chungchangah ngaihdan thar a lo piang chhuak a, nasa takin khawvel kalphung a her danglam a, sorkar thar a lo piang zel a, mipui nunphung leh sukthlek pawh a inthlak a, khawvelin hmasawnna namen lo a tawng ta a nih hi. Chuvangin, Isua zirtirna kha politics siamthatna pui ber a ni tih loh rual a ni lo. Heti zawnga ngaihtuahna seng chung hian kan hma lawk, naktip nakthaia MLA inthlan pawh hi tawngtaina nena hmachhawn ila. Ram hruaitu thlan fuh leh fuh loh hian kan ram leh hnam hmabak a hril thui viau dawn. Nakum maiah General Election (Lok Sabha MP inthlan) kan nei leh dawn a, kum chanve hma lam a nih hmel nghe nghe. Party tui nuin a chimbuai lem loh, fim taka politics thlir thin tan chuan ram hruaitute tih dik loh langsar tak takte hi rilru natna te, thinrimna te thlentu a ni fo thin. Ram hmasawnna kal muang lutuk te, party mi leh sa an invoh nasa thin lutuk te, sorkar hna leh hamthatna thil danga induhsakna uchuak tak te, corruption an khuahkhirh hleihthei lo te, mipui pawisa lek lo a ram hruaitute inlal em em mai te hi sorkar siamtu mipui thiam loh nge, MLA atana thlan tlinte thiam loh zawk? Heng hi tunhma atanga kan sorkar hrawn tawh te sawina a nia. Political party-te inepna leh inbeihna thawm atang ringawt hi chuan ngaihdan siam thiam chi rual a ni lo. Inthlan dawn hnaiah phei hi chuan politics hi inrelna leh inphiarrukna bupui a ni ringawt. Chhe tak takin an inpuh a, intihmualpho an tum a, an khingpuite archuk tui lo a siam an tumna kawngah pawisak an nei tlem hle. A lehlamah chuan hetia politics a tawp viau, kan tih hian politician-te an rinawm lo a, pawisak an nei lo tihna a ni. Khawtlang hruaitu tling, kohhran rawngbawltu leh vantlang chung lam an ni fur lehnghal. Dawt tel lo, dikna leh rinawmna nena politics khelh hun a nghahhlelhawm hle mai. Engpawhnise, politics tui nuin min chim mek lai hian party atchilh nei ve lo mipuite tal hian rilru fim tak pu in vote thlak tum ila. Kum nga lo awm tur a kan ramin hmasawnna kawng dik tak a zawh theihna tur te, kan hnam leh kan sakhua a him theihna tur te, kan hnam hmelma hlemhletna khuahkhirh tura hmala ngam tur te ngaihtuah chunga vote thlak a ngai. Khawtlang nun tichhetu langsar ber pakhat chu zu leh ruihhlo hi a ni, kohhrante pawhin hei hi an vei hle. Hmeithai leh fahrah tam tak an awm phah a, pawikhawihna leh dan bawhchhiatna tam tak a thlen phah a, tharum thawhna leh thisen chhuahna hial a thleng fo thin. Tun hnai chho a thalai (Kum 40 hnuai lam) thi an tam zia te hi ngaihtuah tham a ni, a bikin zu leh ruihhlo kaihhnawih vanga mipa thi an tam lutuk mai te hi kan hnam hian a la tuar ngei dawn. Indopui pakhatna leh pahnihna a zawh hnu rei fe chu indona a mipa/thalai thi an tam lutuk avangin Europe ram hrang hrangten an tuar hle an ti. Khuarel dan chuan mihring punna hi mipa leh hmeichhe tam lam inbuk tawk hi a ni thin a, mahse, thil dang vangin mipa emaw hmeichhia emaw thi an tam thut chuan a hnu lam chhuan lo kal turte a nghawng thei a ni. A tua te pawh hi sorkar se kan ram leh hnam hruai tura inpete hian kan hmabak hi an vei tak tak a ngai. MLA candidate zinga thenkhatte hi chu ram leh hnam vei em em lo, ram leh hnam hmasawnna tura ngaihtuahna seng lem lote an ni hlawm. Politics an zuan fuh vang te, an lansarh vang leh hausak vang te a MLA ticket chang chho ta mai te an ni maithei. Mipuite hian vote thlak dawnah mi tha leh mi tha lo, mi dik leh mi dik lo, mi rinawm leh mi depde, a ngaihna hria leh ngaihna hre lo te thliar hrang thiam ila. Mahni awmna party aia hnam hmangaih zawk, party hruaitute aia Pathian leh a kohhran thu zawm duh zawk te hi kan ram hruaitu atan hian kan mamawh ta hle mai. India rama Kristian sakhaw hmabak te hi thlir thiam a ngai viau, sakhaw tih bik nei party an len tak viau hnu hian harsatna a thleng tam ta khawp mai. Hengte hi ngaihtuah fo bawk ila. Vote thlaktu mipui hi sorkar siamtu kan ni thin a. Inthlan lai hi mipui hlut lai ber a ni a. Inthlan hnu a sorkar an siam hnu hi chuan kan thlan lalte nena kan inkar hi a zau viau zel. Chuvangin, kan chunga roreltu tur kan thlan dawn hian rilru fim put a ngai hle. Tunhma atangin sorkar kan hrawn tawh te kan duh khawp lo thin a, kawngpui tha te, electric power te, tui thianghlim te, eirawngbawlna gas te kan mamawh em em a. Thalaiten eizawnna kan mamawh tak zet a. Dan bawhchhiatna leh pawikhawihna hrang hrang vangin mipui kan him lo sawt viau bawk. Eirukna a hluar a, mirethei ngai an bet reng a. Mi tam tak an beidawng tawh hi a mawh lo. Mahse, beidawng tur erawh kan ni lo, beiseina nei tlat ila, kan politics a kal fuh hun a la thleng ang. A tawpna atan chuan kan ram hruai tura inpe party leh pawl hrang hrangte hi an intiamna atang ngawt chuan thlan chakawm tak vek an ni. Duhthlan tur bik a vang ang. Mahse, tunhma atangin an intiam anga an awm leh thin lo hi kan buaina a ni a. Mipuiin kan ning a, sorkar a inthlak phah leh thin a nih hi. Tunge kan vote tak ang? Kawngpui te, zu leh ruihhlo te, kan sakhaw himna te ngaihtuah chunga vote thlak tum ila. Mahni bial chauh kan thlir a nih chuan bial chhung dinhmun hre chiang, mi tak tak an tha mai ang. Ram pum huap kan thlir dawn a nih chuan - Mi tak tak, mi taima leh rinawm, mi dik leh hlemhle lo, sum leh therhlo hmanga campaign ve lo, ‘Hei chu a Zo pa hle mai’ kan tih tur ang chi hi an tha ber ang. Mahse, candidate langsar zingah Dawt bill la tawh te, eirukna leh dan bawhchhiatna thubuai nei mek te an awm nawk si a, a buaithlak dawn khawp mai.