1970 fur lai khan pa pakhat hi Arizona pal tlangin a zin a. Petrol thunna hmun pakhat a va thlen lai chuan ruahpuivanawn a sur tluk tluk mai a. Chutiang ruahsur hnuaia petrol han thun tura thawktute han tihbuai vel pawh chu a inthlahrunawm khawp mai a. Thawktupa chu a lo chhuak a, faifuk rat rat chung hian a petrol chu a rawn thun khahsak a. Pawisate an inpek fel pah chuan inthlahrung aw tak hian, “Ruah sur karah ka rawn tibuai che a, a pawi ka ti khawp mai,” a’n ti a. Chupa chuan, “Pawi ka ti hauh lo mai. Vietnam-a indonaah kan awm lai chuan a hlauhawm thei khawp mai a, a hrehawm ropui si a. Silaimu vung thur thur mai kara khuarkhuruma kan tawm lai chuan ka inngaihtuah nasa mai a. He hmun hrehawm rapthlak tak atanga ka dam khawchhuak a nih chuan a lawmawm turzia ngaihtuahin, ka dam chhuak a nih phawt chuan engahmah phunnawi tawh loh ka intiam a. Tun thleng hian engahmah ka la vui leh chhin ta lo,” tiin hlim hmel pu takin a lo chhang a. Nun hlim tur hian kan thil tawn mek kan dawnsawn dan leh thlir dan hi a pawimawh khawp mai. Kan nunah hian kan control phak loh thil tam tak a thleng thei. Ruah sur se kan tih riau laia ni a sa tlat te, ni sat kan duh nia ruah a sur tlatte hi kan thu lohzia tilangtu a ni. Kan thuneih theih piah lam thleng thlenga kan lungkham a, kan rilru a hah a, kan thin a rim ta maite hi kan nun tihlim lotu a ni fo. Tul lo leh sawt loa kan phunna hi a tam khawp mai. Sawt hauh lo kan lungkham vak avanga mut theih loh zante a awm thin. Lungkham leh rilru hah hian kan hriselna a tichhe thei. Kan tihdanglam theih hauh loh leh kan thuneihna piah lam thil thlengah hian lungawi takin, ‘kan tih theih piah lam a ni e’ tih mai te hi ching ila. Vanduai bika inhriat zel maite hi a tha lo. Thil tha lo kan chunga thleng thenkhat lah hi kan cho chhuah te a ni a. Mahni cho chhuah ngei thilah pawh kan vui leh tho maite hi chu ngaihtuah ngun deuh a tha. Lungawi taka, “Ka phu reng a ni,” ti duh loa, “Eng kan ti nge hetiang hi kan chungah a thlen bik?” tia vuina kan han zawng leh site hi a dik ber lo. Ruahpuivanawn sur hnuaia huh zawr veka hnathawh ai khan Vietnam silai mu kar kha a la hrehawm zawk avangin thil thlir zau leh dawngsawng thiam tan chuan ‘Vuina tur reng hi a lo awm lo e’.