Dr Ka Zawhna

Vun lama harsatna chungchang

Dr. Chawnglungmuana - Mar 15, 2014

Vun lama harsatna chungchang

Vun lam insawiselna chungchangah zawhna kan dawng hnem khawp mai a. Kan tawng a hausak tawk loh deuh avangin a sawi fiah dan pawh a har viau mai. Bawl, bawk, duk, dum, thak, vual, durh, pan etc tih te hi in rawn sawi dan chu ani ber a. Bawl han tih hian Dermatology lam chuan blister, vesicle, pustular, macro and micro tih te pawhin an sawifiah a, chumi a zir chuan a natna tak "diagnosis" an siam a, chumi hmang chuan a enkawl dan pawh a dang thei bawk a ni. Vun lam insawiselna ah hian a common zual te chu vun ro lutuk emaw thlan tam lutuk vanga awm te, ei leh in emaw damdawi huat vanga harsatna awm thin te (allergic reaction), vun rawng inthlak danglam (discoloration) te, arngeng (acne) te leh, fungal infection te hi a ni awm e. Ni zung natna tia an sawi fo, UV radiation vanga vun lam insawiselna pawh hi a awm fo bawk. Kan vunah chuan a langsar lai, ni sa dawng lai - hmai, nghawng leh ban te hi enkawl uluk ngai lai an ni a. Ni tin pawn chhuak ngai, nisa hnuaia chhuak fo thin tan phei chuan sunscreen lotion hi regular taka hman a pawimawh khawp mai. Chutah pawh chuan zing kara inhnawih mai hi duhtawk lovin chawhnu lamah pawh inhnawih tel a tha hle. A dawt leh ah chuan hmun biru lai, kap, zak, kaiza te hi enkawl uluk an ngai leh viau bawk. Heng hmunah te hian thlan a tam duh a, fungal infection hi a awm hma bik em em a ni. Thawmhnaw hak, a bikin kekawrte te hi ro tha ni thei se, thawmhnaw hnawng hak te hian infection a awm duh zual hle. Nipui kan thleng chho dawn leh ta a, thlan chhuak a tam anga, in silfai ngun a pawimawh lehzual dawn a ni. Zing leh zana hmaiphih fai te hi a pawimawh hle. Vun natna tam tak hi kan rawn sawi tak allergic reaction vanga awm ani thin a. Ei leh in emaw damdawi ei huat vang te, thawmhnaw hak huat vang te, naute ah chuan diaper rash an tih ang chi te hi a chhan common tak te chu an ni. Tin, natna tam tak hi vunah a lang chhuak thei bawk a, a bikin auto-immune disease an tih mai (SLE ang te) ah te hian vun lam insawiselna an nei duh hle bawk. Eng pawh nise, vun lam natna hi hmelhriat te emaw midang sawi atanga mahni damdawi inchawh chawp mai lovin vun doctor (Dermatologist) te ngei in entir theih nise a tha hle. A damdawi composition hriat mang loh, khawchhak damdawi an tih ang te hi hman loh a him ber. Tin, steroid lam chi damdawi reng reng hi fimkhur taka hman tur a ni a, doctor rawn lo phei chuan hman loh tawp hi a him ber a ni.
Share now