June thla lai hâwl a ni a, zan lamah pawh khua chu a lum nangiang thin mai. Tâwnzau nên chauha awm pawn kan inchei mah mah têp thin alâwm mawn’le! Zanin phei chu thlâ, la rawn bial êm lo mah se, khaw lum kârah pawh a tawrh hlelhawmna chhuah a thulh duh chuang lo a, tuar a har tak zêt mai.

Ka computer-a ka thawnthu ziah lai chhunzawm tûr pawn, chu thla êng chuan ka thâ min ei hêksak mêk a. PageMaker file inhawng sa diama ka thu ziah lai chu zan rei hnua ziah chhunzawm atân tiin ka minimise a. Winamp-ah George Jones-a hla, ‘Tennessee Whiskey’ ka zaitîr lah chuan whiskey bottle min hlattîr viau ang lawi si a!

Chutih lai chuan ka Computer kianga mû, ka Zozial tui mi—tlâwn khat la bâng chuan a dang lei belh ka ngai tih min hriattîr a. U Pâpuii zial ngei mai chuan ka lung min lèn leh ta mauh mai a. Ka tho a. U Pâpuii dâwr lam chu ka pan thla ta rak rak a.

Kan khaw kawngpui kawi tin mai chu hlah nei aih lo chuan chu nipui zân thla êng chuan a lo chhun êng tuar pek a. Kawngkama bawlhhlawh bâwm khai chenin an lang mawi vek mai a. Tin, YMA hall thlang lawka hmâwng thing lo ding tâwi laih lah chuan lung hi a’n dum khawp a—chu thla êng hnuaiah chuan. Hâw lamah ka thu châwl der der ang—ka thawnthu ziah bâk ngaihtuah pahin, ka ti rilru neuh neuh bawk.

Chûng ka hmuhte chuan kei, thawnthu ziak thin pa hi min dêng dawt a: ‘Siamtu din mihringte siam chawp, hêng bawlhhlawh bâwm takngial pawn an mahni siamtu mihring lung an dum thei a nih ngai chuan, bawlhhlawh bâwm siamtu mihring chu eng nge maw a nih a, amah siama dintu lung dum thei lo khawpa a chapo tâk mai le? A lakah hian, amah mihring siamtu hi a lâwm zêl ang em le?’ tih chu ka inzâwt ta a. Tin, ka zak ta êm êm a!

Pâpuii zial leh kuhva ro ka lei hnu, tlâwn khat leh kuhva, khâwr hnih ka hit zawh hnû chuan ka tho a. Kal ka tum lai chuan naupang pakhat hi a lo tei lût ter ter pek a. Ani chuan dispo’ cup-a vûr sen, a fawhna kuang chhawm chu a chêng khat thîr rawn ken teng teng chuan a rawn lei a. Tin, a vûr sen lei, a liah hlep hlep chu ka liak ve hlep hlep châk ta tlat a. Ka lei ve. Ka kuhva thial ka lem hnu chuan, ka vûr sen lei chu ka liak ve—a tui phian.

YMA hall lam panin ka kal ta a. Ka va thleng. Thlâ chu a la êng reng. Tin, hmâwng kûng pawh a la chhun pha reng tho a. Mahse, thil danglam ka va hmu ta!

Râwlthar pali hian eng emaw hi an lo thut bial laih a. Kei, a hminga kan khaw Branch YMA Executive Committee member leh Kohhran thalaia OB ni pha ve min hmuh chuan an ti dai mai. An thil thut bial laih pawh chu an hlat dâwrh nghe nghe.

‘E! Min hlau a ni ang,’ tiin inphah hniam ‘lui’ tak chungin, ‘E! Min hlau suh u. Thla êng lâwm ila…’ ka va ti vei thawr thawr a. Min la nêl chuang lo. An la ti tho. An mahni ‘mantu’ ni lo, kei hi min la tih tlat! Nihna ka inbel chawp—khawtlâng leh Kohhrana ka nihna hi an zah—mihring ve tho keima nihna hi!

‘Phawrh ula,’ ka’n ti vei thâwr a. ‘Inthlahrunna tûr a awm hlei nêm. Ngawi rengin thla êng kan lâwm a ni ve mai a,’ ka ti zui a.

An zînga pakhat chuan tîm zetin ‘fûn lî’ a rawn phawrh chhuak dê dê a. Mi dang pawn an hnung hnim kâra an lo thuh rûk dispo’ no chu an rawn phawrh chhuak ve sang sang bawk a. A thlitu pa hmaah chuan an dawh ta far mai. Kei pawn ka vûr sen ei bânna, dispo’ no khat chu ka dawh ve ta ringawt a. Chutia ka ti chu mak min ti a, an nui dar dar hlawm a.

An boss deuh bera lang chuan an thil ‘khiu-riu’ chu a’n seh hawng thuai a. Kan noah chuan min thlitsak ta diat diat a. Kei pawn ka vûr sen no khat chu ka va dawh ve dâ dâ kha…

An in ta sap sap a. In pah chuan titi holam tak tak kan vâwr pah a. An in leh zêl a. Tin, kan titi pawh a ho lo tial tial. Ram an veizia te leh kan khaw zirnain an duh thu a sâm lohzia te, kan khaw dispensary changtlun tâwk lohzia te, an awmna phai rama awm ang neih ve châka an tui hâlnate an insawisiak ta a; a va’n ngaihnawm tak êm!

Zan dâr 10 hnaih dâwnah chuan a tîra a thlitu pa khan hâw a rawt ta. A tho hluai mai. A thian tû ma’n an hnial ngam si lo. Kan khaw hmasâwnna tûra an thil vei zawng zawng chu sawi kimin an la inhre hlawm bawk si lo. Mahni in lam panin, thla êng hnuaiah chuan, tû ma thlah ngai awm loin an tîn ta dial a.

Kei chu hmâwng thing hnuaiah tho chuan ka la thu zui reng a. Thawnthu ni lo, tûna ka thil tawn mêk chuan ngaihtuahna thui tak min neih zuitîr a. Ngaihtuahna tam tak nên ka thu fual ta reng a ni.

Hêng râwlthar rualte hi an bo hlen miah lo ang. An heti reng dâwn lo. Engtik niah emaw chuan an rawn tho leh dâwn khawp. Kan khawtlâng tâna mi tangkai ber ni thei tûrin hriatna leh thiamna an nei a; kan chhawr thiam leh thiam loh azir a ni tawh mai. Tin, Kohhranah pawh, chu tho chu. An thil tih aiin an nun chhûng ril thlîr hmasak a ngai dâwn a lo ni. An rilru a suala a kawih loh phawta hnu, thil sual hi an chîng hlen miah lo ang, tih ka ring ta tlat a. Kan YMA Hall kianga zu fûn pet tet thin nun atang hian nun mawi tak a la pàr chhuah theih ka ring tlat a ni. Sualin a rah beh reng theih ka ring lo a; ka phal bawk hek lo.

Vûr sen no khat ka va dawh ve hmang khan, zû aia thlum ka va tem ta dep dep a nih chu!