Hindu sakhaw lehkhabu Srimad Bhagavad Gita bung 4:1 ah chuan an pathian chungnung ber Lord Krishna thusawi ti hian a inziak a, “Kei hian he yoga boral thei lo hi ni-pathian Vaivasvana ka zirtir a, Vaivasvana chuan a fapa Vaivastu Manu a zirtir leh a, Manu pawh chuan a fapa Ikshvaku a zirtir leh ta a,” tiin. He lehkhabu hi Hindu sakhaw lehkhabu ropui Mahabharata chhunga mi a ni a, an pathiante pahnih Krishna leh Arjuna inbiakna a ni a, bung 18 leh chang 700 a awm a. Hindu ho hian an ngaihlu hle a ni. Vawiin hi UN in International Yoga Day ah a puang a, ram hrang hrangah hman a ni dawn a, India ramah phei chuan sorkar laipui a phur bawk a sum tam tak sengin khawpui hrang hrangah a huho a yoga tihna an buatsaih nual a ni. Tuna India rama rorel mek BJP hi sakhaw tih bik nei an ni a, fing tak leh thiam taka an sakhua chawisan zel a, sakhaw dang zuitute nekchep zel an tum niin an sawi thin reng a. He International Yoga Day pawh hi prime minister Narendra Modi rawt chhuah a ni nghe nghe. Nikum September thla khan UN General Assembly-ah yoga hi hmasang India mite hnen atanga thilpek hlu tawpkhawk khawvelin a dawn a nih thu a sawi a. A rawtna ang hian a hnu lawk December thla a UN General Assembly chuan June 21 hi International Yoga Day atan hman thin a rel thlu ta a ni. He ni hi Lalmanga Nu Lawm Rawih Ni a ni a, Narendra Modi hian khawvel hmar lama awmte tana ni rei ni ber hi Yoga Day atan a rawt rual hian he ni hi hindu pawl hmingthang tak RSS dintu Keshav Baliram Hegdewar thih ni a ni kher bawk si a. Mi thenkhat chuan BJP sangawi zawnpui, 2014 inthlanpui an chak theihna tura pawimawh tak RSS dintu thih cham kher prime minister-in a thlang hi RSS leh Modia-a te inzawmna thuk zia tilangtuah an ngai nghe nghe a ni. June 21 hi Yoga leh hindu sakhaw tan pawh ni pawimawh tak niin an sawi bawk a, yoga hmu chhuaktu Hindu pathian pakhat Shiva’n yoga a puan chhuah hmasak ber ni niin an sawi bawk. Tam tak chuan yoga leh hindu sakhaw inzawm ngheh dan hi kan hre lo maithei a, taksa sawizawina leh rilru hahdamna atan a that zia an sawi rual hian a bulpui chu sakhuana a ni tih hi phat rual a ni lo. Bhagavad Gita chuan, “Aw Partha fapa (Arjuna), keimahah hian i rilru i nghah a, min hriatna tak tak nei chunga yoga-a i tih phawt chuan ka nihna-zia i hre fai vek dawn a ni; chu chu lo ngaithla rawh,” tiin a inziak (Bung 7:1). Hindu-ho tan chuan a pathian thu viau a ni. He lehkhabuah hian pathian leh yoga inkungkaihna thukzia hmuh tur a awm nual a. “Aw Partha! Yoga inbuatsaihna a awm a, thil dang zawng aia chatuan minung ngaihtuah tlat mi chuan, an taksa an chhuahsan hnuin minung nihna hlunah chuan an awm hlen thin,” tiin a inziak bawk. Yoga hi hindu sakhua chawi larna hmanraw tha tak a ni a, taksa leh rilru sawizawina tha tak a nih avang hian saphote bakah khaw chhak hote pawhin an tuipui thar hle a. Tun hnaia India-in ram danga a thawn chhuah hnem ber chu yoga hi a ni, an ti hial. America-ah chuan mi maktaduai 20 vel yoga ti thin an awm an ti a, hindu sakhaw zuitu pawh an pung tial tial a, chung zingah chuan milar tak tak pawh an tel. Sakhua azawnga rilru zau ber an nih avang te, yoga leh Ayurveda tuipuitu an tam zel avang te, India economy hmasawn vang te hian kum 100 a vei leh chuan sakhaw lian ber a ni thei hiala ring pawh an awm. Mizoramah pawh hman deuh atang khan hindu sakhaw theh darh tuma hmala an awm reng a, sum leh therhlo chi hrang hrang nena an chet avangin an zarzo engemaw zat an awm tawh a, ruka inlet pawh an awm nual tawh bawk. Yoga chungchangah hian Kristiante ngaihdan a inang lo viau a; mahse, a nihna tak hre chiang leh inkhawm thin ringtu tak takte chuan Kristianna nen a inkalh tlat niin an ngai tlangpui a. Chutihlaiin rawngbawltu zingah pawh hnualsuat lem lo thahnem tak an awm tho bawk. Sorkar laipuiin vawiin a International Yoga Day hmang tura India mipuite a sawm lai pawh hian Catholic rorelna sang Catholic Bishops Conference of India (CBCI) chuan Kristiante ni thianghlim Pathianni khera Narendra Modi kaihhruai sorkarin Yoga Day a hmang hi an dem thu an chhuah tawh a. India hmarchhak hi Kristian tamna hmun a ni bawk a, sorkar laipui pawhin ngaihnathiamna thui tak a nei niin a lang. Mizorama Kohhran hrang hrang telna MKHC chuan thuchhuah tlang tak an nei tawh a, Yoga Day hi Pathianni a nih avangin kohhran mite chu tel lo turin an ngen a. Nagaland Baptist Church Council (NBCC) pawhin Pathianni a nih avangin Kristiante tan Pathian biakna rilru a tibuai thei dawn a, he hun hmang tura tihluihna a awm chuan sakhaw zalenna a kalh dawn tih an puang bawk. Muslim-ho zingah pawh duh lo an awm a, a bik takin yoga tih laia hindu sakhaw thuchham (tawngtaina) ni pathian chibai bukna chu an duh loh thu an sawi a. BJP MP Yogi Adityanath chuan Ni pathian chibai bukna thuchham duh ve lo chu tuifinriatah zuang thla daih rawh se, a tih avangin inhnialna a chawk chhuak nasa hman hle a. Mahse, Sorkar chuan he thuchham hi tihluihna a nih loh thu an puang nghal thung. Hnam dang Kristiante ngaihtuah chuan Mizote hian kan la duh fir hle a. Sorkar laipui pawh hian kan sakhaw lak run dan hi an hre chiang turah ngai ila, vawiin a International Yoga Day pawh hi keini chuan kan hmang ve lo a nih pawhin ngaihnathiamna an nei ngeiin a rinawm. Engpawhnise, sorkar laipui a thuneitute hi hindu rum rut mai, india ram hindu rama siam tum thinte kha an ni nawk si a, keini lah chu hnam tlemte, india rama sakhaw te ber zinga mi bia (minority group) kan nih avangin kan hmalama kan dinhmun tur pawh hi ngaihtuah chian a tul ta khawp mai.