Inkharkhip hian thaw a tipik a, kan boruak hian lung a tizing a, min hualtu hripui hlauhnain min hmet chau a, eizawn theih loh avangin kan mangang a. Kum khat leh a chanve dawn chu kan zalen famkim thei ta lo. 

Eng bawia awm emaw hi a hrehawm a, nun zalen lo hian thaw a tipik a. Zalen kan nih theih nan Fapa meuh pawh a inhlan a nih kha a! 

July 19, 2021 atanga khauh lehzuala kar thum zet kan han inkhuahkhirh thar leh hnuah kan inthlah zalen hret dawn ta a ni awm e. Covid erawhin min la kiansan chuang der si lo. Tun tum zalen dâr hi ralkhel dârah ngai ila, raltit zual zawk tur a ni ang! 

“Zalen in ni ta, in zalenna chu sual nan hmang loin..,” tih ang deuh khan, kan zalen hret a nih pawhin tihsual palh nan hmang lo tura fimkhur a ngai dawn e. Zalenna hmang thiam loa inpal hnawk hi an tam thin tawh bawk, nun kawng hrang hrangah hian. Kan zalen dawn a nih pawhin inthlahdah nana hman chi a la ni lo tawp!

Tupawh hi hri kai anga ngaih vek a tha ta! Tu bulah pawh awm ila, “Hri a lo kai hlauh pawhin kei chu a lak atangin ka him ang,” ti thei tur khawpa fimkhur a va \ha ve!! Chutianga confi taka tithei chu veng hrang hrang Contact Tracing Team hian an hmu nual a nia, an khung lo! Mi fimkhur na na na, khung zel tur an ni hek lo! Fimkhur leh uluk em ema inveng tawk tawkte pawh kan khung zelte chuan Covid laka nun him dan tur (CAB - Covid Appropriate Behaviour) zawm man a awm nang!

Tu bulah pawh awm ila, “Hri ka lo pai ru ve reng thei a, ka lak atang chuan tuman an kai chhawng lo ang,” ti thei tur khawpa mi dang venpui a hun takzet e! A Kristian nun tlat!

Chhungte nen pawh ral khat inngaihsak bak ti lo ila. Colony khatah pawh cheng ila, kan thinlung bak inhnaih rih lo ila. Tunlai chu Online tih a lar bawk a, tupawh online-a inngaihsak hi a tawk rih e!

Hri kan lo kai ve thut a nih pawha hnu chhuitute hnena dawt sawi ngai lo tur leh sawi kim duh loh nei lo turin nung Kristian ila!

Insawiselna neih deuh chuan inchian (test) thuai mai tur. “Ka khawsik kumhlun a chhuak a niang,  ka zun kawng a niang, ka kum tin hritlan hun a nia,” tikual loin finfiah vat tur. Mass testing an kalpui mekah hian inringhlel lem lote pawh an hmuchhuak nawlh nawlh zawk a nia. 

Mahse, RAgT Negative vangin lo thlamuang ngawt suh. RAgT Positive chu Positive tak tak an ni a, Negative chu False Negative a ni thei, 50% lai an tih kha!! Fimkhur loh zui phahna tlak a ni lo ve. Ralthuamte thul khung zui daih chuang suh.

Hri kaite dem mai loa tanpuitu nih tum ila, an rilru hliam belhtu ni loin tuam damtu nih tum ang aw! Mi dang tana harsatna thlentu ni lovin, mi dang tana tangkai ve tum vek ila.  Hnawksak loh ringawtte hi tangkaina chi khat a ni ve a nia! Tanpui ngai ngawih ngawih buaipui tur an tam em em laia mi hnawksak satliah lo buaipui tel ve sek ngaite hian LTF te lu a tihai zual teh mai a nia. 

Hri hian kan tlawmngaihna tidal lo se la, kan tlawmngaihna hian hlauhawmah min dintir kher lo se la, kan ze mawi tak hian mi dang tirâlkhel kher lo bawk se la aw! LTF duty-na hmunahte hian hmai tuamna kan pawt thla a, mei zuk leh kuhva ei paha inhnaih taka kan titi suam suam a nih chuan a dik bik nang!

Hri hian kan kristianna tidal lo se la, kan kristianna hian Samari mi tha tluk se la! Offline-a inngaihsak a tul a nih phawt chuan fimkhur takin kan ri rap zel ang chu! Covid19 hlauh luat avanga tanpui ngai pawh kan puih ngam loh chuan a dik lo ang! Samari mi tha khan a tanpui tur kha a analyse vak hmel loh, tanpui ngai a hmu a, a che nghal rap a nih hmel. Fimkhur taka intanpui dan zawn zel tur a ni ang.

Zam lovin aw! Min vengtu chu Lalpa a nih kha, vengtu kan nei tha a nia! Min vengtu hian, “Min venpui rawh u,” tih tum a neih ve kha! Min vengtuin min venhim theih nan hian kan puih a tul ve a niang!
 

Covid laka himna hlado dang a awm rih lo, hei lo hi chu:
Hmai tuam la,
Kut tithianghlim la,
Mi dang nen hlam khata inhlatin awm rawh la,
 Vaccine la ang che.