Aizawl khawpui kan hmuh dan hi sawi ta theuh ila, a inang lo viau hlawm ang. Hnam dang lo zin thenkhatten khawpui thianghlim leh fai tak, a chengte pawh rinawm tak an nih thu an sawi leh zauh thin a, chutianga min hmu chu a lawmawm ang reng phian. A thatna lam zawnga thlir chuan vairam khawpuite aiin boruak a la thianghlim a, mihring dinhmun pawh a la inrualkhai viau a. Kohhran leh tlawmngai pawlte avangin kan la inthlungkhawm tha a, khawtlang nunah mipui mimir kan la inpawh tlang hle bawk. Hengte avang hian khawpui nuam tak, a bikin Zofate tan phei chuan khawvela khawpui nuam ber a ni chiang mai. Mahse, a langsar lo lama kan lan dan leh a sir lehlama kan dinhmun hi a tha vak lo thung. Zep thu a cheng lo, tunlai tak phei hi chuan khawpui him lo tak, dan leh hrai pawisak lohna hmun, tharum thawhna leh pawikhawihna hluarna khawpui, ruihhlo tamna, zuruite zalenna khua a chang tan mek...ti pawhin sawi ta ila kan daw vak lo ang. Aizawl pa Rokunga'n rambuai hun thim laia Zawlkhawpui dinhmun chhe lutuk mai 'Nun suar ang a chim' a tih lai leh tuna kan dinhmun hi a inhlat viau lo maithei a ni. Aizawl hi 'duat hlawh lo khawpui' ti pawhin sawi ta ila kan daw lem lo ang. Sapho hun lai, a tir lamah kha chuan sipai hmunpui a nih avangin a duh duh pem luh theih a ni lo a. Mahse, hun a lo kal zel a, rambuai avangin mi an pem lut ta ruih ruih a, ruahmanna mumal a awm loh avangin hmun remchang apiangah in leh lo a ding zel a, hmun awl a vang zel a, vantlang kawng ngaih pawimawh a nih loh avangin rei lo te ah khawpui chep tak a lo chang ta a ni. Nasa taka Aizawl a than chhoh lai khan hmalam hun thlir chunga ruahmanna fel tak nena hmalakna a awm lo kha a pawi khawp mai. Dik tak chuan Aizawl hi pemkhawmte chenna hmun a ni a, mi hlun intite pawh hi chhuan thum chhuan li kal ta vel a pem lut ve tho kha an ni hlawm. Chung a cheng hmasate chuan vantlang hmun leh kawngpui an ngai pawimawh loh avangin hmun tinah kawngpui nek rana insa hmuh tur a awm thluah a nih hi. Zawlnei Isaia'n, "Ram lailiah anmahni chauh an awm theihna tûra mi tel vena hmun reng reng awm lo khawp hiala in leh in inzawmtir zel leh, lo leh lo inzawmtir zel thintute...," a tih ang mai kha a ni. ADA leh AMC din hnuah pawh dan leh hrai palzut a in sak hmuh tur a tam hle a, a huai huaiin an sa huai ni maiin a lang. Khawpui enkawltu Municipal Council hmasa ber lah hi politics thli chhiain a nuai zauh zauh a, khawpui hmasawnna hna thawk tura mipui beisei an pha lo viau lehnghal a. Lirthei tlan tawt (traffic jam) tihrehna tura an hmalak dan - Maxi cab dinna te, parking fee tihsan vak te - hi mi dangte tana harsatna thlen tur chi, a sap tawnga 'negative measures' a ni zel mai a. Mipui tana harsatna thleng tur ngaihtuah thleng lo a thutlukna siam pawp thin hi a tha ngai lo a, hruaitu tha zia pawh a ni lo. Kum tir atangin sorkarin chhiah hrang hrang leh buhfai man a tihpun vanga mipui an phun sup sup laiin property tax lak te an la tum ta deuh deuh a. Hengte hi Aizawl hmasawnna tur liau liaua hmalakna ni sela chuan mipui phun pawh hi a zia ang mawle. Sorkarin zu a zawrh hnu a khawpui tawp tak zia te hi mi tam tak chuan kan chik lem lo maithei a, car tha leh manto taka chuang, traffic jam kara tlan tlang thinte pawh hian an hmu ngai lo a ni ngei ang. Chhun khaw engah kawng sira zu in hmuh tur an awm fo a, tlai lamah leh zan lamah an tam leh zual. Vantlang hmuna zu in leh zu ruih MLPC Act in a khap tih hi mipui hian kan hre lo a nih pawhin khuahkhirhna hnuaia zu zawrh min tiamtu sorkar tal hi chuan a hre tur chu a ni a, dan a lekkawh ngei tur a ni. Vantlang hmuna naupangte hmuh theih tura zu in leh zu rui an zalen ta em em mai te, khawpui hulum laia damdawi rui an hmuh tur an awm zut mai te hi khawpui him lo zia dik tak a ni a. Aizawl enkawltu thuneitute inthlahdah zia a lang chiang hle bawk. Kohhran hrang hrangah harhna thleng lo phei se chu kan dinhmun hi a chhe leh zual ngawt ang. Central YMA in ruihhlo do tura SRS a din leh ta hi a lawmawm tak zet bawk. Zan lama Aizawl tawp zia hi an sawi fo thin a. Lirthei khalhtuten dan an pawisak loh avangin kawngpui a him lo a, tleirawl hawklak pawr tak tak thawm hriat tur a awm chamchi a, tharum thawhna a thleng fo a, rukruk leh in rawk a hluar hle bawk. Kawngpui dungah rui buai leh tei rawlai mai mai, a then chu nawhchizuar tih hriat reng reng hmuh tur an tam hle a. Mipa inzuar pawh an awm tawh an ti! Chutihlaiin, thalai zingah nun hlim lo leh rilru hrisel lo an tam ta viau pawh hi ngaihthah chi a ni tawh lo, nun beidawng pung zel hian thil tha lo zawk a thlen thin si a. Aizawl thalaite hi kan hlim em? Kan lungawi em? tih hi ngaihtuah tham a ni ta. Mahni nihna leh dinhmuna lungawi lo, rualawt ngawih ngawih, nalh duh em em, chhungkaw dinhmun ngaihtuah miah lo a incheina/thawmhnaw, gadget, etc., ringawt buaipui, mi neih ang apiang neih ve duh..chutiang chu tleirawl/rawlthar zingah an tam tial tialin a lang. Chutiang zelin thalai zingah hel rilru pu tlat, chhungte laka lungawi lo reng mai, khawtlang pawisa miah lo, mi dang zahna nei lem lo, ho te a mi dang beih ching, etc., an tam chuan hnam tan a him lo thei. A tawpna atan chuan Zofate lungrualna Zawlkhawpui a mipui nun him loh zia te, dan bawhchhiatna hluar zia te hi mut mawh hnar mawha neih a hun ta khawp mai. Khawpui thianfai tura sorkarin hma a lak a, kohhran leh tlawmngai pawlte nen pheikhai rual tak a beihpui an thlak hunah khawpui thianghlim leh nuam a chang ngei ang.