Luangliam

Zinkawng Khawhar Zawhtu (Kei Aiin A Phur A Rit Zâwk!)

Zirsangkima - Jun 05, 2022

He kan zinkawng khawhar takah hian, rethei ber leh chan chhe ber angah inngai thin mah ila, keini aia harsa zâwk leh kan phurrit aia nasa phurrit phurtu hi an lo awm zêl zu nia le!

Thu Hma

Khawhar leh phurrit phura ka kun tlawk tlawk cháng te, beidawng leh lungngaia ka rùm vawng vawng chángte hian, he hla—Country legend, mi tam takin ‘Father of Country & Western Music’ tia an chhàl, Hank Williams (1923 – 1953)-a’n ‘Thy Burdens Are Greater Than Mine’ a sak hi ka hre chhuak thin a, ka zãng huai thin.

He hla hi Country singer leh hla phuah thiam, Pee Wee King-a’n May, 1949-a a phuah a ni a; a thianpa, Redd Stewart-a sak chu tlángzarh hmasak ber a ni. (Pee Wee King hi Country hla chuai thei lo ‘Tennessee Waltz’ te, ‘Slow Poke’ te leh hla dang \hahnem tak phuahtu a ni). Hank Williams-a record hi a thih hnu 1956-ah chauh tih chhuah a ni thung.

Zinkawng Khawhar Zawhtu

Chu lamlian khawhar tak chu mahniin ka zawh rak rak a. Ka zawh mék lamlian insial ruih chuan khawii khua nge a pawh a,  khawiah nge he lamlian hi a tàwp ang tih rêng ka hre lo. 

Dik tak chuan kei putar, chakvak tawh lo tán chuan chu zinkawng han zawh zui zêl pawh chu a zuamawm loh kher mai. Zinkawng zawhpui thian pawh ka nei lo a, ka iptê-ah lah pawisa deré takngial pawh ka ak tawh si lo! Tuithãwla ka tuisik pai ve lah chu ka in zo leng tawh bawk si! A va retheih thlâkin a va khawhar thlâk tak êm!

Khaw Êng Ka La Hmu Thei Tal Alãwm!

Chutia zinkawng khawhar ka zawh lai chuan thingtláng khaw te tak tê hi ka thleng hlawl mai a. A khua chu tê hle mah se, luahlumtu a nei ngei tih ka chiang a; ka khaw-harna pawh chu a zia deuh sawt hian ka hria.

Khaw chhúng ka lût a. Kawng sírah hian pa pakhat, kei aia la nau fé tih hriat reng, thingkûng hnuaia lo thu hi ka hmu hlauh mai a. ‘Kha, i tha maw?’ tia ka’n biak chuan ani chuan hlim sánga min nuih pahin a that thu min hrilh a. Ka’n en chian nâk chuan min hmu reng reng lo tih ka hre thei—a mit a lo del a nih chu!

Chu mit del chuan kawng kânpuiah min sáwm a. Kawngpui ka kânpui lai chuan ka rilru-in, ‘Lalpa le! Ka harsatna ai fé-in ani harsatna hi a tam daih zâwk a; kei aiin a phur hi a rit daih zâwk a nih hi le! Harsatnate chu nei ve bawk mah ila, khaw êng ka la hmu thei tal a; kawngdunga kaih ngai khawp paw’n ka la awm ve lo e!’ ka ti ta a.

Ka Hming Ka La Sawi Thei Tal Alãwm!

    Chu thingtláng khua chu kalsanin ka zinkawng chu ka zawh chhunzawm leh ta a. Rei pawh ka kal hma-in khaw pakhat ka va pawh leh a. Kawng sírah chuan mipa naupangho chu ball pêtin an lo inkhêl a; an ri chêl chûl mai. Hmun remcháng laia hahchawlh pahin ka thlír reng a. 

An zínga mipa naupang pakhat chu, a thiante zínga ball pêt ve tum chuan tan la-in theih tâwp a’n chhuah ve ngial thin a; mahse, a pêt ve thei lo achha chu a ni e. Ka’n en chian nâk chuan a ke a lo bai a ni!

A hnu deuh chuan ka kiangah a rawn thu ve a. A hming ka’n zâwt a; min chháng thei lo! A lo tawng thei lo bawk a nih chu le! Chuti chung chuan a hlim a ni tih hriat tak hian min nuih ver ver reuh a … a nuna thil thleng chu a ràwn tehrêng nèn. Bai auh auh chunga min kalsan lai chu ka thlír reng a. ‘Lalpa le! Ka harsatna ai fé-in ani harsatna hi a tam daih zâwk a; kei aiin a phur hi a rit daih zâwk a nih hi le! Harsatnate chu nei ve bawk mah ila, hetianga thui zinkawng zawh theihna tùr ke ka la nei a; ka hming sawi thei leh ráwl tàwp chhuaha àu theihna tùr awtha ka la nei tal a!’ tiin ka tap chhuak ta a.

Hmangaih Ber Ka La Nei Tal Alãwm!

    Zinkawng khawhar tak chu ka zawh chhunzawm leh ta a. Thui fé ka kal hnu chuan thlànmual, hlui angreng tawh tak hi ka hmu fuh hlauh mai. A chhúngah chuan tlangvál, la thalai tak mai hi ka va hmu a. Thlàn lung pakhat hmaah chuan a lo thingthi ngãwih chu niin!

A kutah chuan rose báwr mawi tak hi a keng a; a hmui phun atang chuan chung lamah tawngtaina thu a thawn chho a ni tih hai rual a ni lo. Chu thlàn lungah chuan hawrawp mawi tak hian he thu hi a lo inziak a: ‘I thlarau chu Lalpa hnênah; nangmah hriat rengna erawh ka chan!’ (You’re soul is God’s; you’re mem’ry mine) tih hi!

Thlànmual gate páwn atang chuan ka thlír reng a. Ka tap chhuak ta ringawt a. ‘Lalpa le! Ka harsatna ai fé-in ani harsatna hi a tam daih zâwk a; kei aiin a phur hi a rit daih zâwk a nih hi le! Harsatnate chu nei ve bawk mah ila, hmangaih berte then loa la dam tlánga min enkawl avàngin ka làwm e,’ ka ti ta a. 

He kan zinkawng khawhar takah hian, rethei ber leh chan chhe ber angah inngai thin mah ila, keini aia harsa zâwk leh kan phurrit aia nasa phurrit phurtu hi an lo awm zêl zu nia le!

Share now