Ka naupan lai khân (han ti ve ngial ila) Tumkau Ní-a tumkau cháwia kawng zawh te kha nuam ka tiin ka phûr thei hle mai. Hetia “pa” (patling chu ka la ni hlei thei chuang lo a!) ka nih hnu pawh hian he Tumkau Ní hian Jerusalem mipuiten Isua kalna tùra puan an lo phah chanchin sermon te, naupang hlim leh làwma an àu chanchin te, Isua zirtirte intih theih tùrzia te leh khami ní-a Jerusalem mipuite tìtî tùr sermon-te kha ka ngaithla fo a; mahse, amah Isua phurtu Sabengtung no chanchin leh a hnên atanga zir tùr kan neih lam sermon erawh chu ka ngaithla khât khawp mai—a khát pawh a ni lo ang—ka ngaithla ngai lo a ni hial zâwk ang chu!

Isua khân khâ Sabengtung kai tùr khán a zirtír pahnih a tír tih kan hria. Zirtírte a tirh kha, Zawlnei hrilhlâwkna a tih hlawhtlinna a ni (Zak 9:9). Pathian Thuah hian Sabengtungin a entír chu inngaihtlawmna (humility), mi dangte tána hna thawktu (service) a nih avànga tuarna (suffering) leh remna/thlamuanna (peace) thlentu a ni. Chuvàng chuan Sabengtung no chung khera chuan Isua’n a duhna chhan chu tláwm taka remna thlentu a ni tih entiína a ni.

Bible-ah hian indonaa hnehna changte chu Sakawr chungah an chuang thìn a—lal deuh, intithei deuh angin. Mahse, indona avànga remna thlentír kha Isua thil tum a ni rêng rêng lo. Tlàwmna hmanga remna thlentír kha a tum (goal) a ni zâwk a. Chutih rual chuan, mihring lalte chu sakawr chunga chuangin, lal an nihna leh hnehtu an nihna an lantír thìn. Chu chu khawvêl dàn a ni. Mahse, Sabengtung no chunga chuang chu, mihringte lal ni loin, Vàn Pathian Lal nihna lantírtu a nih avàngin, mihring lalte chuanna ang ni loah a chuang a ni zâwk.

Hmãnlai hunah chuan, lal thar tùr lo piangte chu, an naupan laiin Sabengtung no, a pa, kum li hnuai lam chungah an chuantír fo thìn. Isua pawh khân, tú ma la chuan ngai lohna Sabengtung no chunga chuan a duhna chhan chu ‘lal thar’ a ni tih entírna atán a ni.

Thuthlung hlui han keu ta ila: Sabengtung kan hmuhna chu Numbers 22:23-ah, Moab ram pana kal mitdel Balaama chanchin kha a ni mai àwm mang e. Khã Sabengtunbg kan hmuh leh Isua chuanna Sabengtung chanchin hi chu inpersan tak a ni thung. “Thuthlung hlui Sabengtung”-ah chuan thinrimna leh invuakna kan hmu a; chutih rualin, “Thuthlung thar Sabengtung” chuan remna, hmangaihna avànga tawrhna leh Chhandamna min hrinsak ta zâwk a. Hêng thu pahnih atang ngawt pawh hian, Isua Krista hi kan tána pianga “Remna Pathian” tia pawm loh chi rual a ni lo! Amah chu kan Thuthlung Thar, kan Chhandamna a ni, tih a entír chiang mang e!

“Phelh ula, han kai rawh u … Isuan a duh a ni…” (Mar 11.2,3; Lk. 19.31, 35) tih tawngkam ringawtina kan nuna hrilh min tum, zir lai a pai rûk tên tûn hi kan hre pha em le? Isua’n a hnêna kai tùra a duh, Sabengtung no kha thlun a ni tih kan hria. Ran thlun beh rêng rêng, tangkaina nei an awm ngai lo. Mi ngaihsak pawh an hlawh lo. Tin, Isuan a duh kha Sabengtung no a ni a; a vulhtuten chhawr pawh an la chhawr lo ang tih a chiang reng mai. Tangkaina nei tùr leh chhawr theih tùr chuan a thlunna atã phelh phawt a ngai—chu chu a duh tlat!

Vawiin Tumkau ní hi thlunna atã phelha awm Sabengtung leh Isua inzawmna ní a ni a; Lal Isua hi chàwimàwia awm tírtute chuan, Sabengtung no chu a thlunna atã an phelh hmasa thìn. Vawiin hi kan nuna phelh ngai kan inphelhna ní ni se se la, zalèn ve tawh ila… 

Sabengtung no, tu ma la chuan ngai lohna kher hi engati nge Lal Isuan a duh? A chhan chu, tu ma la chhawr loh, tu ma la hman loh, Sabengtung thianghlim, ‘virgin donkey’ kher hi Isuan a duh tlat.

Heti hian i ngaihtuah maithei—“Kei chu sual hmanrua ka lo ni tawh si a. Ka thianghlim tawh si lo a,” tiin. En teh, vawiin Tumkau Ni-ah emaw, engtik niah pawh, engtik lai pawhin Lal Isua hian mi thar, tú ma la hman ngai loh mi thianghlim angin min la pawm duh asin! Tú ma la chuan ngai lohna Sabengtung ang khán, a ropuina inpuanchhuah nán min la duh a ni zawk! Vawiin hian kan chunga chùana, a ropuina tár langtu atán min la thlang tlat a nih chu! Ropuia a lan hunah, keini pawh ropuia kan lan ve a la phal a nih chu!

Vawiin hian Sabengtung no, tú ma la chuan ngai lohna leh ropuia Jerusalema lût Isua an inzawm ang khán, kan nun leh Isua hi inzawm leh se la. A hman atán inpe thar leh ang u. Kan chunga chuang tùrin Isua hi sáwm thar leh i la, bawlhhlawh tawh leh sualin a lo bâwih hrep tawh ni mah ila, Ani chuan thianghlimah min la pawm a; miten enga tána hman tùr nge kan ni tih min zawh paw’n, “Lalpan min duh a ni,” tia chhàn i tum ang u.