Mizote Kût ropui ber Chapchar Kût chu ni 1.03.2024 (Zirtawpni) khan Aizawl Sipai Lammualah ropui taka lawm a ni a, kumin Chapchar Kût thupui atan 'Zonun Zemawi Tlawmngaihna', hman a ni. Tlawmngaihna hi zofate tan chuan hrilhfiah chawp ngailo a ni. Khawvel a thang chho zel a, zonun zemawi Tlawmngaihna a dai mai loh nâna tun thlenga chawi vul tu tlawmngai pawl YMA hi Tlawmngaihna tih thumal sawi ruala kan rilrua thu awm nghal a ni awm e. Hmanlai atang tawhin khaw hran theuhin Lal hran neiin Lal rorelna hnuaiah kan awm thin a, tlawmngaihna kawngah te, huaisenna kawngah te, Lal leh khawtlang tana mi ai baka tangkaite leh tlawmngaite kha Nopui an dawm tir thin. Mizote hi a huhova chen nuam ti kan ni a, in lâwm thin, khaw chhunga damlo, chhiat tawk, hmeithai leh tanpui ngaite tanpui thin hnam kan ni. Mizo nih ti nuamtu em em kan induhsakna te, phut let nei miahlova midang kan tanpui te hi mihring kan nihna ah a dawngsawngtu tan chuan a va lawmawm dawn em.

Khawvel thang chho zelah zofate pawh kan khawsak a sâng chho zel a, a hmaa tih theih thin tam tak tih a rem tawh lohna khawvelah kan cheng tawh a ni ber mai. Tlawmngaihna a dai tawh emaw a tla hniam tawh tiin kan in sawi fo thin a, kan pi leh pute atanga kan chhawm nun Zonun Zemawi Tlawmngaihna hlut zia sawi vul a ngaihna khawvelah kan cheng tan ta der mai. Mitin mahni buai buaiin kan buai tawh a, a bik takin khawpui a cheng te hi khawtlang tana chet chhuah kan harsat deuh tlat tawh. Hmasawnna in a ken tel ni mah se, khawtlang tana hun pek leh kan hun neih dan te siam rem kan thiamlo tulh tulh niin a lang. 

He thupui Zonun Zemawi Tlawmngaihna sawi dâwn chuan tlawmngaihna fawng vuantu leh chelhtu YMA a sawi loh theih loh. YMA-a inhman hman loh avanga tlawmngai ta lo riaua inhriatna rilru leh che chhuak ve lo te dem bîk an nih mai thin nâ rilru kan neih hi kan bân san a hun. Tu a te pawh hian Tlawmngaihna hlam chhiah mai lo va, kan rilru ngaihtuahna kan khawtlang, kan veng tana pek let emaw rulh tur nei nia inhriatna rilru kan neih a ngai a, tumna kan neih chuan loh chuan inzirtir reng erawh kan hmabak a ni lo thei lo a ni. Mizo kan nih avanga tlawmngai tur kan ni tih hi kan hriat thar a va ngai em. YMA chauh tlawmngai tura kan dahna rilru hi kan paih bo a tul. Mizo tawh phawt chu kan pi leh pute atanga in lawm thin, tanpui ngai te tanpui thin hnam kan ni a, midang te tih atan chauhva kan dah chuan zo zia in kan nunah thu a sawi tam lo hle tihna a ni a, kei ni lo chu Zonun Zemawi Tlawmngaihna vawng nung tur kan awm chuang si lo. Mi inpe te tih atan chauhva dah chi a ni lo va, nang leh kei hian mawhphurhna kan nei a ni tih hi kan hriat a ngai. 

Tlawmngaihna hi tlawm­ngai pawla kan tel avanga chhawm nung zel tur kan ni lova, Mizo kan nih anga kan Pi leh Pute min rochun a nih avang zawka chhawm nung zel tur kan ni zawk. Hnam changkang apiangin an tobul an pi leh pute atanga an chin than an chhawm nung zel thin. Tlawmngaihna avang hian hringnun kan hman puite nen kan inkarah inlaichinna tha zawk a piang a, zonun zemawi chhawm nun zel hi kan tih tur a ni. Phut let nei lova midang tana inpekna te hian mihring nun a ti zahawm a, a mihring puite a chawimawi thin reng a ni. 

Zonun Zemawi Tlawm­ngaihna chhawm nung a, Tlawmngaihna par vul tir reng tur chuan Kohhran leh Khawtlang thawhhona a that a ngai. He Tlawmngaihna chungchang sawi dâwn hian a karah hian thil khi zau tak siamthat theih ni si a awm. Kan khawtlang nuna hmun pawimawh luahtu lian tak pahnihte chu Kohhran leh Y.M.A. hi a ni ti ila kan sawi sual awm lo ve. Mi tam takin Kohhran leh Y.M.A. kan en dan erawh a in pelhsawlh deuh em aw a tih theih. Tunlaiah hian mi tam tak chuan a khawi emaw zawk zawk kan hlam­chhiah deuh niin a lang a. Kohhran lama phur hle si Y.M.A. hun pawimawha lang ngai leh si lo te, Y.M.A. lama phur em em, Kohhran ngaihsak leh miah lo hi kan thahnem ta viau niin a lang.

Missionary-ten Kohhran min rawn din sak dan te hi kan hre viau a, Y.M.A. lo pian dan te hi kan chiang ta hlawm lo nge kan ngaihven tawk lo ni ang? Kristianna a lo luh hnuah kan missionary-te khan kan zawlbuk kha tha an tiin chhawm nun zel an duh a, kan nunphung nen erawh a inmil tak si lovah chuan khaw­tlang inrelbawlna kawngah Mizo ze tha tak nena Kristian nunkawng dik kan chhawm nun zel theihna atan Y.M.A hi a lo piang ta a. Chumi avang chuan Y.M.A hi Kohhran hrin ti pawhin an sawi hial a ni.

Kohhran lama phur taka rawngbawltute hian Y.M.A hi kan rawngbawlna peng a ni tih hi kan hriat thar a tul hle a ni. Chutih rual chuan Y.M.A lama a kul a taia rawngbawl thinte pawh hian Y.M.A hringtu Kohhran hi kan belin kan ngaina ve bawk tur a ni. Kristian Nundan tha ngaihsan tih thupuia neitu Y.M.A. leh a hringtu Kohhran hi kan awm ve ve na tur leh kan rawngbawl ve ve na tur a ni tih kan hriat a kan zawm a pawimawh hle ang.Kohhran leh Y.M.A. hi kal kawp tur a ni tih hria a inhmang hrang tur kan nilo tih hre thar ila, tumah hi inhmang hrang lovin Kohhran leh Y.M.A. ah hian theih tawp i chhuah zel ang u.

Hnam dang nunphungin min rûn mek lai hian kan Mizona rilru hi pu bo lovin, zonun zemawi tlawmngaihna hi a takin i lantir thin ang u. tanpui ngaite tanpui a, midang phut let lova, mi dangte tana inpe ni zel turin leh he Tlawmngaihna hi a chuai mai loh nan, nang leh kei hi kan va pawimawh em. Tlawmngaih­na par vul tir zual zel turin i tang­rual zel ang u.