Pu Hriata Chhangte hian ZU DEM MAI TEH SUH tiin, ‘Zu in avanga sual leh lerh tate khan Zu dem suh u, nangmahni kha in sual sa, in lerh sa a ni mai, mahni inen rawh u’ tih lam hawiin thu tha leh dik zet mai facebook-ah a post a. A thusawi hi sawizau belh ka châk tlat.

Mihring hi â deuh, lerh deuh, h.. deuh, sual deuh kan ni sa roh a. Mahse ‘chhia leh tha hriatna’ pek kan nih roh avang hian chu chuan min veng ta run a. Chutia ven tlat ta na na na chu kan thain kan fel ang reng fu ta hlawm a ni.

Miin zu a in hian, zu chuan chu chhia leh tha, mawi leh mawi lo, awm leh awm lo kan thliar theihna (a saptawngin judgement) chu a chiah zawp thei an tia lawm! Zu kan ina kan ruih hian, ‘thatna zawp khawlo zo ta chu’ kan lo nawi ta hle thin a ni. Vengtu nei ta lo chu le, kan ze pangngai a lo chhuak ta a, kan hawihhawm thei tawh lo a, kan insum zo tawh lo a, kan inveng seng ta lo a. Mi sual, huat ngah, zaktheilo, thinchhia, chapo, lerh leh h.. deuh leh ze tha lo dangte chu a lo lang chhuak ta a, kan lo nawi hle ta thin a lo ni. Kan harhfim leh meuh chuan a pawi tur a pawi zo tawh thin!!

Chuvang chuan Zu hi a ni dik lo zawk chu. Zu hi a demawm a ni. Min tinawitu a ni. Zu tel loa kan fel tehlul nen!

Zu hi in lo ila, rui lo ila, ‘pa tha pui, nu tha pui’ kha kan ni reng mai tur a nia le!! Zu hi a ni, demawm ta ber chu!!

Zu in dawn laia kan rilru put hmang te, kan inna boruak leh kan awmna te thleng hian Zu hian kan miziaah a ‘kai lut’ zel thei roh lehnghal a.. A ngeiawm a nia!!