Zawhna: Kapu, tlangval ka ni a, tunlai hian zu ka in nasa khawp mai a, zu ka in hian zial ka zu nasa em em mai bawk a, chuvang nge thawhah deuhten ka awm thin a, ka e deuh reng mai bawk a, ka kua a thalo deuh reng bawk a. In loh chu a tha ber chuan ka ring tho na a, engtia inenkawl chi nge ni ang? Khawngaihin min pui theih chuan ka lawm khawp ang.

Chhanna: Tunlai zu vanga harsatna tawk tam tak chuan i insawiselna ang hi an nei ve fo mai. Zu hi in thiam a har viau a ni ang e. Chutih rualin awm awl lutuk te, thatchhe lutuk te, mahni hna ngai pawimawh lo, hlawh hmuhna anga en ve mai mai te hian zu an buaipui nasa zual deuh a nih duh hmel viau bawk. Zu ngawlveina “Alcoholism” hi drugs dang ngawlveina ang bawkin rilru lam damlohna anga ngaih ani a, Diagnostic and Statistical Manual of Mental Disorder (DSM-III)-ah pawh a chuang reng ani. Chutiang anih vang chuan Zu Ngawlveina ah hian Tolerance (mamawhna san belh zel), Withdrawal (Nghei vanga chiri), Dependence (a tel lova awm theih lohna) leh Loss of Control (in zat tur insumtheihna hloh) te a awm vek a ni.
Zu i in nasa nia i insawi hian ni khatah engzat chiah nge i in i sawi tel lo va, a tlangpuiin mipaah kar khat chhungin peg 15 (hmeichhia ah chuan peg 12 ang velin an chhut) i in emaw, vawi khat inah peg 5 emaw a aia tam i in chuan zu in vanga harsatna (Alcohol Use Disorder) nei anga ngaih i ni. Peg khat hi 60 ml anga chhut a ni bawk. Zu bakah meizial i zu tel nasa niin i insawi bawk a, zu leh meizial hi a inhmeh viau niin an sawi thin a. Mahse, pum lamah a effect a na zual duh hle. I zu in nasat chhan hi a awm ang em? Chhungkua lamah emaw mi mal nunah harsatna i nei tel ani thei em? Nge i tang laklawh ve hrim hrim ni ang? I zu in nasat chhan hi eng emaw tak a awm a nih a, chumi atan chuan tanpuina i dawng a nih si loh chuan bansan mai i harsat a rinawm. Chuti chung chuan zu in nasa thin, nghei fel hmak tam tak an awm tih i hriat tel a tha awm e.
Zu hian kan taksaah a khawih pawi leh a tihbuai nasat ber chu kan thin (Liver) leh Thluak (Brain) te an ni. Thin hnathawh a lo buai chuan taksa khawl pawimawh tak a buai tihna a ni a, ril lam te, lung leh kal lam thlengin a shock khawlo thei a ni. A hmasaah chuan pumpui acid insiam dan leh hnathawhte a tibuai hma hle. Pumpui lawng emaw pan (Gastritis or Gastric Ulcer) te, chawkawng lama acid irh let vanga lawng (Gastro-esophageal reflux disease-GERD) te a thlen hma a, chu chuan thaw kham lo emaw thaw chham te a thlen a, thawhah nei ang te in an inhre thin. Meizial zuk tel hian a awm hma zual hle bawk. Thin function buai chuan ril chet a tibuai a, khawthalo leh ek mumal lo a thlen zui fo bawk.
Zu hi tlem te chuan thisen zam a tizau a (vasodilation), thisen kal vel a titha thei a, chutiang avang chuan Lung natna thenkhat atante pawh an chawh ve thin. Mahse, in tam erawh chuan a letling zawngin a thawk a, taksa a timurte tui tlachhamin a siam a (dehydration), chu chuan BP sang te a thlen fo mai. A reiah phei chuan lung a tivung a (Cardiomegaly), harsatna dang dang a thlen thin. Kal (kidney) a khawih buai chinah phei chuan enkawl a har hle. Thin function buai vang hian taksa chhunga tui tling te a lo awm thei a, internal bleeding te pawh a thlen fo bawk. Thluak lam a khawih buai theihzia hriatna chu withdrawal an neih hian thil hmuh sual “Hallucination” an neih fo phah thin.
I sawi angin a enkawlna tha ber chu nghei/sim hmak a ni hmasa ber. Chumi tur chuan Psychiatrist te enkawl i mamawh a rinawm bawk. Mahse, a harsa lai ber a ni bawk. Engpawhnise, i nghei nghal mai thei lo a nih pawhin zing emaw chhunah te zu in miah lo la, duhthusamah phei chuan ni tlak hmain zu hi in lo hrim hrim la; tin, i in chuan kaw ruakin in lo bawk la, i dose tihniam la (a tam berah peg aia tam lo), i tui in zat titam la, chaw thlah lo bawk la, a hunbiah chaw ei hram hram la. Chuan i pum ven nan i in hmain Pantop/Omez lam chi ei hmasa la, thin damdawi te ei tel la (Silymarin telna ang chi-Silybon emaw Liveril Forte ang te nitin mum 1 vawi 2), I BP check la, a san chuan damdawi ei tel bawk la, chi (salt) insum la, zan lamah mut hunbi mumal tak neih tum bawk rawh. Zu in nasat hian Vitamin tlakchham a awl em em mai a; chuvangin, Vitamin Supplement te pawh ei tel la (Beplex Forte mum 1 ni tin vawi 2). Mutna damdawi lam chi erawh nangma thuin ei reng reng loh tur a ni thung. Doctor rawn thei la chu duhthusam a ni e.