Zawhna: Kan nau pakhat, hmeichhia kum 39 vel, fa 3 nei tawh a ni a, a zun hi a in fo mai a, engvang nge ni ang, eng damdawi nge ei sela tha ang? Citrol an tihte hi pe ila a tha ang em? khawngaihin min lo pui thei em?

Chhanna: “Zun in” kan tih hi a medical term chuan Dysuria a ni a, an insawisel dan hi a tlangpuiin zun chhuak sek te, zun zawnga serh na/thip emaw tai zawn na te, zun zawha zung zo lo anga inhriat te, a thenah chuan ek lam thlengin a tibuai thei bawk a, ek zawh hnua e kham lo ang tlata inhriatnate pawh a thlen thei. A tam berah chuan zunkawng infection – Urinary Tract Infection (UTI) kan tih hi a ni a, mipa aiin hmeichhiain an nei awl zawk a, a chhan pawh an zunkawng hnuai lam, a bikin phing atanga zun chhuahna lai, Urethra kan tih mai a tawi zawk vang a ni.

Hmeichhia bikah hian nau an pai laia chhul naute vanga lo lian khan phing a nek tawm a, zun in hi an nei duh zual bawk. An nau neih hnuah pawh chhul leh phing insi reng a nih vang hian zun in neih hi a awl viau mai. Tin, Zunthlum (Diabetes) neite hian UTI an nei awlsam bawk. UTI kan tih hian kal (kidney), zun kawng (ureter), phing (bladder) leh zun chhuahna dawt (urethra) a khawih thei vek a. Dysuria a awm erawh hi chuan phing bik hi a khawih buai zual a ni deuh ber bawk.

UTI hi sex hman atanga kai theih a nih vangin sexually transmitted infection (STI) lan chhuah dan common tak a ni bawk. Chutiang avang chuan nupui pasal nei tawh, zun in insawiselna neite chu an kawppuiten insawiselna an nei ve em tih zawhna kan zawt ngei bawk thin. A chhan ber pawh anmahni chauh kan enkawl a, an kawppuite treatment kan pek ve loh chuan an nei nawn fo thin. Tui in tlem avang te, serh silfai that tawk loh vangtein UTI hi an nei fo bawk.

A enkawl dan kawngah chuan infection vang a nih leh nih loh hriat a pawimawh a, zun test (Urine R/E) kan tihtir hmasa thin. UTI an neih chuan an zun test-ah hian WBC a tam a, a thenah chuan thisen RBC a awm tel fo bawk. Chutih rualin Urine R/E normal mah se insawisel tlat an awm thei bawk. Antibiotic pek hnu pawha ziaawm thei lo an awm thin avangin chutiang angah chuan an zunah hrik to dan enna (Urine Culture) test an tihtir a, hrik to a awm chuan eng damdawi (antibiotic) nge tha ber ang tih hriat nan Sensitivity test an ti tel nghal bawk thin.

Antibiotics damdawi tam tak hi kan hman dan a dik tawk loh avangin thawk tha thei lo (resistance) a awm ta fo mai. Chuvang tak chuan a nazawnga antibiotic ei loh hi a tha hle. Kan ei a nih pawhin a dose dik tak leh ei hun chhung tur ang thlapa ei a pawimawh hle. Infection vanga zun in nei a nih chuan antibiotic eng emaw ber a mamawh dawn a, doctor inentir ngei thei se, antibiotic a ngeih tur ngei an chawh thei ang.

Zun inah chuan phing bang hi a lo insangmar fel lo thin a, chumi control nan chuan damdawi chi khat, Flavoxate (Urispas) kan chawh tel thin a. He damdawi hian phing tihrawl kha a tizal a, chu chuan an zun in harsatna neih kha eng emaw chen a tiziaawm thin bawk. Tui in tam a ngai hle a, zun a insiam tam a pawimawh hle. Citrol hi zun pH (a thur leh al enna tiin sawi ta mai ila) tithur tura an pek tel thin a ni a, a tangkai dan chen a awm bawk.

A dang lehah chuan zun kawnga lung awm (urolithiasis) vangin hetiang insawiselna hi a awm fo mai bawk. Zun kawnga lungte tla thla te, phinga lungte tang vangtein zun in hi an insawisel fo mai. Chuvangin, ultrasound hmanga enchian a pawimawh bawk. |ha ber chu doctor-ah bawk chiang zawkin lo inentir thei ula, investigation kan han tar lan takte pawh an lo chawh leh ngei che u a rinawm a, chung result a zir chuan a damdawi enkawlna tur dik tak chu an chawh thei ngei ang che u.