Zun kawnga lung awm (Urolithiasis) kan tih mai hi a awm tanna lai ber chu kal (kidney) ani duh hle a, ke a kal tha hlei thei lo, zeng, bawksawp rei tawh ah te chuan phinga lung awm (bladder stone) hi a common viau bawk. Mizote zingah pawh Urolithiasis nei hi an thahnem viau mai a, kum naupang tea nei te pawh kan hmu ta fo mai. Urolithiasis hi a chhan tak han sawi fak tur a vang hle a, nei duh bik an awm emaw tih chang te pawh a awm fo mai. A chhan ni theia an sawi zingah chuan zun tlem lutuk te, zun kawnga calcium deposit tam vang te, zun dawt engemaw lai ber fel loh vang te, vitamin A leh C tlakchham vangte niin an sawi. Lirthei khalh nasa te hian an nei duh phian bawk. A enga pawh chu nise, chhan leh vang awm hauh lova he harsatna nei hi an thahnem hle. Khua a lum chho a, kan taksa in tui a mamawh zat a dawn loh chuan dehydration a lo awm a, chu chuan zun insiam a titlem a, chu chuan he harsatna hi a thlen duh zual. Chuvang chuan tui in tam hi kan intih hmuh a pawimawh hle. A lung hi chi hrang hrang a awm avangin a thenin na an tawrh viau laiin thenkhat erawh na hre mang lovin rei tak an awm thei bawk. Engtinnge an insawisel dan? Mihring kan in ang lo viau mai a, thenkhat chuan insawiselna engmah nei hran lovin ultrasound check-up pangngaiah te an hmu chhuak nawlh a, insawiselna nei zingah pawh a nat dan a inchen lo thei hle. Kala lung insiam hi zunkawngah a rawn tlak thlak a, a tan laklawh chuan zun rawn chhuak tur kha a dal a, a na duh hle mai a, na (pain) an sawi zingah chuan na ber pawl nia sawi a ni hial, patling hi an thlan a tla zawih zawih thei hial a ni. A nat chuan nak thuar thla leh tai zawnah a ni tlangpui a, mipaah chuan a na zawh thla hian sazu hmawr a fan thei bawk. Lung hi a len chuan na a siam nep duh phian a, lung te leh hriam chi hian na a siam duh ber a ni. Zun thi (hematuria) te a siam thei bawk a ni. Phing (bladder)-ah a awm chuan zun laklawh laia tawp chut ang te a thlen thei a ni. Zun kawnga lung awm hi hre tur leh enkawlna dawng tur chuan investigation mumal tak tih a ngai a. Ultrasound, zun test, kidney function test leh IVU te hi tih hmasak ngei tur a ni. Investigation ti mumal lova in enkawl hi a fuh ber lova, tul lovah damlote’n pawisa an seng thlawn fo. A enkawl tur chuan Surgeon ngei ni thei se, an ngaihdan (professional opinion) rawn hmasa thei ila a tha hle. A then chu zai ngai te a ni a, a lung len dan te pawhin a hril a. Tun hnaiah hian a enkawl dan changkang Ureterorenoscopy (URS) a tih theih tawh a, phing kaltlangin zun kawng an en a, lung an hmuh veleh an chhu keh thin a, chumi hnu chuan kar 2 chhung te a lung nawi a tlak fel nan pipe (stent) an dah thin bawk. Mahse, stent hi phawi leh ngei ngei tur a ni a, phawitir theihnghilh an awm zauh zauh a, inenkawlna lak laiin doctor te thurawn chiang taka zawh/hriatfiah ngei a tha hle.