Zawhna: Ka pu, mipa kum 30 ka ni a, tlereuh (thi leh zungbun) ka inbel hian ka thi leh zungbun hi a thîm (uk khurh) zel mai a, ka thiante hian hrisel lohna i nei ani ang min tihsak a, enge a chhan ni ang?

Chhanna: Hetiang ang mi hi an awm zeuh zeuh ni awm tak a ni a. A chhan tak hi sawi tur a vang phian mai. Mi thenkhat chu thlan ngah deuh te an awm a, chumi vang chu ani thei awm e tih te pawh a ngaih theih a, mahse thlan ngah apiang an ni chuang leh lo. Kan vun hian sulphur a siam nasat chuan chumi atanga acid insiam chuan tlereuh te hi a ti ung thei ni awmin an sawi bawk. Hrisel lohna engemaw tak neih vang chu anih hmel loh. Thenkhat chu rangkachak bik ngeih lova insawi te an awm a, a then chu silver bik te an awm leh bawk a. Enge a chhan tak han sawi fak tur a vang hle. Ngaihthat loh nan erawh hmang lo thung la.

Zawhna: Hmeichhia kum 30 mi fa pahnih nei tawh ka ni a, ka hmai hi a rawn duk nasa khawp mai a, damdawi lam ka hnawih pawhin engmah a ang thei si lova, pum lam nge ni ang a, chhul lam ni ang? Tai na leh bawlhhlawh chhuak vel pawh ka nei thin a, a eng vang ber nge ni ta ang? A duk zau chak bawk si a, a rang lamin khawngaihin min lo pui hram ta che, ka mang a ang khawp mai.

Chhanna: Hmai duk hi a chhan hrang hrang a awm thei a. Kan vun rawng siamtu pigment melanin rawn tam thut vang a ni fo a. Hmeichhe naupai vang te hian a awm thei a, hmai engemaw tihpalh (hriat lem loh) vang, a bikin chemical engemaw tak huat vang te a ni thei bawk. Thin tha lo te, thi neih mumal lo emaw dik lohna engemaw tak vang te pawhin heng harsatna hi a awm thei bawk a ni. Damdawi engemaw tak huat vang te pawhin a awm thei a, tin, hmai hnawih lam chi huat zawng tak vang te pawh a ni thei bawk ang.

Engpawhnise, vun doctor Dermatologist thiam tak tak kan nei a, han inentir hmasa phawt mai la, an ni hian a tul angin refer i ngaih leh an lo buaipui thei ngei ang che. Hmeichhe lam fel lohna tai na leh bawlhhlawh chhuak i sawi tel avang hian hmeichhe lam fel lohna i nei anih duh hmel viau mai a. Ultrasound hmanga i chhul leh chibawm endik te pawh a tul ngeiin a rinawm. Hmeichhe lam doctor Gynecologist lo inentir tel thei bawk la, i harsatna hi an puih theih ngei che ka beisei.

Zawhna: Hah harna damdawi hi a awm em? Exercise hi ka la ve reng a, ka fit thei lo lutuk a, ka beidawng tawh. Khawngaihin min lo hrilh thei ang em?

Chhanna: Taksa fitness atan hian exercise hi a pawimawh khawp mai a, chumi ruala kan hriat tel ngei tur chu ei leh in lam uluk hi a ni. Weight loss tur emaw fit tur chuan mithiamte sawi danin exercise hian 20% vel a pui a, a bak 80% chu ei leh in lam ani an ti hial. Chu chuan kan ei leh in uluk pawimawh zia a hril awm e. Mizote hi a tam zawk chaw ei danah chuan riltam viau hnua ei tawk hi kan chin dan a ni a. Tun hnai chho hian mawm leh sa lam chi te, fast food te kan ei nasa ta khawp mai a. Heng kan ei tam zawk hi a hrisel fahran lo a ni. 

Ei leh in uluk ka tih hian insum vak lam ka sawi lova, balanced diet lam zawk a ni a. Kan taksa mamawh zat thlum (carbohydrates), thau (fats) leh protein hi balance taka kan lak luh a pawimawh tihna a ni. Tin, zan kan meng rei a, zanriah ka nei hma si nen, zan lamah ei leh in lam kan uar leh thin a, hei pawh hi a hrisel lem lo. Tukthuan (breakfast ti pawhin sawi ta ila) hi kan ei that zual a pawimawh hle. Zanriah lam erawh ei tlem thung ila, chu chu a him tlangpui a ni.

Exercise ah pawh hian fitness kan duh chuan tihdan phung hrang hrang a awm a. Ke a kal tam hi a tangkai pawl tak chu a ni a. Mahse fit tur chuan regular a pawimawh hle. Tunhnai ah gym te kan intihhmuh chho ta zel a, hei hi thil tha tak a ni. Mahse kan kum leh taksa mil tawka exercise kan tih thiam a tul hle thung. Chumi tur chuan instructor thiam tak tak an awm tawh a, anmahni hi rawn thin ila a tangkai hle. Hah harna atan damdawi lam erawh tih loh tluk a awm lo; fit tura damdawi lam hman loh hi a him ber a ni.