David Lalromawia hi HS Lalremruata leh Lalrammawii te fa niin July ni 2,1997-ah a piang a, unau pathum zinga a upa ber a ni. Tunah hian Electric Veng Aizawlah an cheng mêk. Zirna lamah St. Mary's School Electric Vengah bul tanin, KG-1 aṭanga Class-VIII a zo va, High School hi Govt Mizo High School ah a zo va, Hss hi Govt Mizo Hss aṭangin a zo bawk. Govt Mizo High School a luh lai hian NCC-ah telin Mizo High School Pipe Band ah a tel a, kum 2013 khan New Delhi-ah Republic Day hmangin an zuk kal nghe nghe.

Kum 2019 khan B.A. (Political Science) Govt Aizawl North College atangin a zo a, M.A. (Tribal Studies & Ethnomedicine) hi Mizoram University aṭangin kum 2021 khan a zo bawk.

Electric Veng Branch YMA Chanchinbu 'Tuitu' Editor ni mekin, kum 2022, 2023 ah leh kum 2024 atan tlawmngaia chelh tura ruat nawn leh a ni. Govt Aizawl North College a luh laiin Student's Union Asst General Secretary a ni ṭhin a, hemi hnu hian Mizo Zirlai Pawl ah inhmang chho in, 2022 khan Mzp Chanchinbu Editor atan ruat a ni a, tunah hian Editor a la ni mek a ni.

Thu leh Hla a tui ve tak a ni a, a thuziak hrang hrang hi Aizawl Chanchinbu hrang hrang leh College hrang hrang Annual Magazine-ah te a chhuah ve fo tawh thin a ni.