Chhuanliana BVT hi March 8, 1929-ah Mission Veng-ah a piang a, A pa hi zirtirtu hmasa Ch. Pasena niin a nu hi Chawntuahi a ni. Amah hi Chawngthu hnam a ni Mizoram pawna lehkhazir hmasa zingami niin, 1943-ah Shillong St Anthony's-ah pawl sarih a zir a, 'Ka pass nge pass lo pawh ka hre lo," tih chu ama sawi thin dan a ni a, 1945 -ah Sipai-ah kum tling lovin a lut a, Indopui pahnihna zawh hnu lawk 1947 khan ban a ni leh zui a, amah hian, "Tling lovin sipai-ah ka lut a, tling lo bawkin ka bang," tiin a sawi thin.

Pu Chhuanliana hian Forest Guard hna te pawh a lo chelh thin a, he hna a thawh lai hian Bilkhawthlir-ah Pu Bawktaia Sai kah a chan thu a sawi thin a, Forest Guard tih a mawi lo a ti hi tun thleng hian fiamthu thawh nan a la hmang thin.

Malaria avangin he hna hi a bansan a, Aizawl lama a rawn chuanchhuah leh hnuah Mission Vengah bawk a let leh a, hetihlai hian Mission Veng nula zawng zawng a rimchhuah vek thu hi tun hnu thleng a titi pakhat a ni a, khatihlaia tu tlangval mahni an rim ngam loh te thleng a rim chu tun thlenga a uanna pakhat a tling.

1953 atang khan Ralleng ram (Nagaland) a district thar Tuensang-ah LDC hna a thawk a, 1961-ah a Pa (Ch. Pasena) a thih tak avangin a bang a, chhuk leh lovin Aizawl Civil Surgeon office-ah LDC hna bawk ka thawk leh a, he hna hi head clerck a nih thlengin a chelh a, 1989 khan a pension a ni.

Buai lai khan hek anih avangin jail hrang hrangah a tang kual nasa hle a, khatihlaia Assam Chief Secretary KN Kidwan pawh a thubuai avang hian tum tam tak a hmu a, he CS hian a hming pawhin a ko thei hial a, parole phalsak an tum loh pawhin a nupui leh fate pali hruaia lo enkawl sak tura ngen chawt mai kha a ni a, CS pawh hian tih vak ngaihna a hre lo a. Parole hi a dil chuan a pe zel mai thin.

Sipai bang a nih avangin ('Ka lo nih khanglang avangin,' tih chu a sawi duh dan a ni) tuna a chenn, Bethlehem Vengthlanga a huan hi Bawrhsap LL Peters kha a pe a ni. Chu chu ti hian tun thlengin a awmchilh ta a ni.

Chhuanliana hian unau pianpui 10 neiin puitlin thleng dam chu hmeichhia 2 leh mipa paruk an ni. 1956 khan Zahmingthangi d/o Upa Rokunga, Mission Veng nen inneiin, fa hi hmeichhia pahnih leh mipa pahnih a nei a, an la dampui vek. Lehkhabu pahnih, Chawhchawrawi leh Chawhchawrawi Rawi Lehzual tih a ziak tawh.