Mizoram Snooker & Billiards Association (MSBA) buatsaih, Mizoram State 10 Ball Pool Ranking Tournament 2024 chu Zirtawpni zan khan semi final khelh zawh niin Zonuntluanga leh K Lallawmkima ten an tumpui hneh ve vein Inrinni tlai final-ah an inhmachhawn dawn.

Semifinal hi race to 8 (frame riat la hmasa sa chak)-a khelh niin Mizorama player tha rual pali an insu a. Inkhel hmasa zawkah Lalchhandama, Dinthar leh Electric Veng tlangval, Zonuntluanga te inhmachhawnin inhnehtawk tak karah tawnhriat ngah zawkin 8-6-in hnehna a chang.

Inkhelhnuhnung zawkah hian R Lalthazuala, Chaltlang leh Lawmkima te inhmachhawnin Khatla South tlangval hian 8-4-a hnehna changin final a inhlang kai bawk.

Thawhtanni tlai atanga khelh tan, Mizoram State 10 Ball Pool Ranking 2024-ah hian Mizoram hmun hrang hrang atangin player 40 chuang an tel a, final hi Inrinni tlai dar 5:00-ah MSBA Hall, Hawla Indoor Stadium, Republic Vengthlang-ah khelh a ni dawn a, race to 10-a khelh tur a ni ang.

Final-a inhmachhawn turte hi tawnhriat nei ngah tawh tak ve ve an ni a. Lawmkima hi kum 2022 khan Mizoram State 6 Red Snooker Championship 2021-22-a lo champion tawh jkha a ni a. May thla khan Mizoram State 9 Ball Pool Ranking Tournament 2024-ah semi final a lut tawh bawk.

Zonuntluanga pawh hi Mizoram Snooker Championship 2018 leh Mizoram Snooker Ranking Championship 2019-a lo champion tawh kha niin kumin January khan Mizoram State 6 Red Snooker Ranking Tournament 2024-ah final lut bawkin Mizoram State Games 2019-ah khan Pool 8 Ball-ah champion a lo ni tawh bawk.

Mizoram State 10 Ball Pool Ranking Tournament 2024

Semi Final - June 28, 2024 Result

7:00 PM: Lalchhandama 6 - 8 Zonuntluanga

8:30 PM: R Lalthazuala 4 - 8 K Lallawmkima

Mizoram State 10 Ball Pool Ranking Tournament 2024

Final - June 29, 2024

5:00 PM: Zonuntluanga vs K Lallawmkima