Mizoram Snooker & Billiards Association (MSBA) buatsaih Mizoram State 10 Ball Pool Ranking Tournament 2024 chu Inrinni tlai khan khelh zawh a ni ta a, K Lallawmkima, Khatla South a champion.

Thawhtanni tlai atanga MSBA Hall, Hawla Indoor Stadium, Republic Vengthlanga tournament khelhah hian Mizoram hmun hrang hrang atangin player 40 chuang an tel a, final hi race to 10 (frame 10 la hmasa zawk chak)-a khelh a ni.

Final-ah hian Aizawl Electric Veng tlangval, Zonuntluanga leh Khatla South tlangval inhmachhawnin tawnhriat nei tha ve ve an ni a, darkar hnih chuang zet inkhelin Lawmkima hian 10-6-in hnehna a chang ta a ni.

Lawmkima hi kum 2022 khan Mizoram State 6 Red Snooker Championship 2021-22-a lo champion tawh kha a ni a. May thla khan Mizoram State 9 Ball Pool Ranking Tournament 2024-ah semi final a lut tawh bawk a, nomawi lian tham dang a lak belh leh ta a ni.