Aizawl: Mizorama lirthei lut enkawltu Transport department chuan 2017-18 chhung khan lirthei 20152 an ziah luh belh a, kum hmasa lama ziahluh aiin 3911 zetin a tam, lirthei tlan lai hi 212241 chuang a awm a, two wheeler an tam lawr lak. Hei hi Statistical Handbook Mizoram-in a tarlan dan a ni.
Traffic jam avanga leklam nuam two-wheeler hi a tam fal hle a, lirthei awm zawng zawng chanve aiin tam hi motor cycle/scooter an ni a, nuaih hnih chuang zet motor awmah hian 127970 zet hi ke hnih nei lirthei an ni. 2017-18 chhung khan ke hnih nei hi 14377 mi mal ta a pun belh a, sorkar-in 45 a lei thar ve bawk. Three-wheeler, Auto-rickshaw kan tih ang chi hi 2017-18 khan 290-in mimal ta a pun belh a, sorkar hian pakhat a nei ve bawk. 2016-17 khan mimal auto-rickshaw 500 chuang registered a ni a, hemi kum chhung hian sorkar-in pahnih an lei ve bawk.
Taxi hi permit pek a nih tawh loh rualin 2016-17 chhungin 527 ziahluh a ni a, kum kalta chhung khan 573 ziahluh a ni a, heng taxi te hi a hlui tawh thlakthleng (replace) ni ngeiin a lang. Mizoram-ah hian taxi service hi 7330 a awm mek, niin statistical handbook hian a tarlang. Maxi cab kan tih, Sumo ho ang hi 2016-17 chhung khan 152 ziahluh niin kum kalta chhung khan 125 ziahluh a ni. Luxury cab kan tih ho, AC awm, a kawngkhar pawh power kan tih ho ang chi, Rental Car hova hman chi ho hi 2016-17 khan 17 chiah ziahluh anih laiin 2017-18 ah kha chuan 55 lai ziahluh a ni tawh thung.
2016-17 chhung khan sorkar chuan car thar 112 a lei a, kum kalta chhung khan car hi 139 a lei belh. Mi mal car hi 2016-17 khan 2057 ziahluh a ni a, 2017-18 chhung khan 2439 ziahluh leh a ni, tunah hian car hi Mizoram-ah Transport department hnuaia registered 43966 tlan lai awm anga chhut a ni.
Sumdawnna lam leh mamawh phur lirthei hi pung chang zingah telin 2016-17 khan sorkar hian bungraw phur chi (goods carrier) hi 17 chiah an lei laiin 2017-18 ah kha chuan bungraw phur chi lirthei hi 81 zet an lei belh. Mimal ang pawhin a kum telin bungraw phur lirthei hi a pung a, 2016-17 khan mimal lirthei ziahluh 1297 a awm laiin sorkar kum kalta chhung khan 1581 zet ziahluh a ni leh bawk.
Hnathawh nana kan hmang tlang lawn ber zingami, Kawng laih nan leh hmun hma laih nana hman thin excavator hi 1416 zet tunah hian hna thawk theiin an awm a, heng zinga paruk chiah hi sorkar ta a ni. Lei leh nan leh huan siam nana khawl tangkai tak Tractor hi 347 chiah a awm a, heng zinga 39 hi sorkar ta a ni. Mihring phur chi Bus hi 1350 a awm a, sorkar ta 327 a awm.
&&&&&