June 21, 2022; Sawrkar kum kalta, nikum April atanga kumin March (2021-2022) chhung khan, Mizoram ah damdawi zawrh phalna nei mi 70 te license chu cancel niin, suspend mi 7 an awm.

Food & Drugs Administration chhinchhiah danin, drug license cancel sak mi 70 zingah hian an license renew loh vanga cancel sak an awm laiin, 'condition of license' bawhchhiat vangte a cancel an awm a, general drugs license hmuh vanga license hmasa retricted drugs license cancel te pawh an awm. License neitu in midang a hmantir vangte, drug license hming a dawr hawng lo te leh license neitu boral tawh vangte a license cancel sak an awm nual bawk.
    
Food & Drugs Administration chuan drug license neitute chu insawifiah tura hriattirna an pe thin a, chung a an insawifiahna a pawm loh te chu, 'Rule 66 of Drugs & Cosmetics Rules, 1945' tlawhchhanin a cancel a, license cancel te chu an license hmangin damdawi kawl leh zawrh phalsak an ni tawh lo.

Kum kalta chhunga drug license suspend mi 7 te chu thla 1 atanga thla 3 inkar suspend an ni tlangpui a, damdawi ruih nan a hman sual theih an hralhchhuah vangte, license in a huam loh, ruih nan a hman theih kawl vangte a suspend an awm bawk. Suspend an nih chhungin damdawi dawr hawn phalsak an ni lo.