Aizawl; Railway consultant, Hrangtawna (IRTS Rtd.) chuan Rs. vbc. 6,547 vel senna tur, Bairabi - Sairang rel kawng chu nakum December-a zawh hman tum a ni tih sawiin, hna pawh thawh mek zel a nih thu ZALEN a hrilh.

Zawhna chhangin Hrangtawna chuan tun hnaia Assam tui lian leh chhiatna dang thleng vang-in hnathawh eng emaw chen a khaihlak ve deuh tih a sawi a, zawh hun tura ruahman, December, 2023 a nih thu leh hnathawh a kal chhoh zel thu a sawi.

Bairabi-Sairang rel kawng hi broad gauge railway line tur a ni dawn a, RITES-ten he rel kawng sial survey hna hi 2005 bawr khan an zo fel a. Hna hi sawrkar laipuiin kum 2008-2009 khan sanction-in a tira estimate chu Rs. vbc. 2,384.34 a ni a, ennawn zel niin tunah chuan Rs. vbc. 6,547 bawr vel sen ral a ngai dawn nia chhut a ni. A hna hi 2015-ah khan tan niin, zaa 70 chuang hret zawh tawh a ni.

Bairabi atanga intanin Sairang huam telin rel station pali a awm dawn a, chungte chu Bairabi atanga a hlat zawng tehin, km 16.38-ah Hortoki station, km 26.10-ah Kawnpui station; km 37.12-ah Mualkhang station leh a tawpna, km 51.38-ah Sairang station te an ni.

Bairabi - Sairang rel kawng thui zawng hi km 51.38 niin, lei dawh lian (major bridge) 55 leh lei dawh tenau (minor bridge) 87 a awm a. Hmun 32-ah leiverh (tunnel) a awm a, leiverh  zawng zawng thui/sei belhkhawm chu km 12.63 a ni dawn a. Leiverh thui ber sei/thui zawng chu km 1.88-a thui a ni.

Ram hectare 481.18 a zau an hmang mek

Kolasib district-ah forest ram hectare 38.94-a zau leh non-forest land mi mal ram hectare 308.01

Aizawl district-ah forest ram hectare 35.547-a zau leh non forest land mi mal ram hectare 98.595

Compensation Rs. vbc. 840 bawr vel ram neitute pek an ni tawh