Aizawl January 13, 2023: 2023 atana MPCC Friday Political session hmasa berah MPCC Vice president Lal Thanzara chuan 2023 inthlan chu tih palh sawrkar MNF tawp hun tur, a ti a, ram hmasawnna tur ngaihtuah lova sum hmuhna tur contract hna insiam thinah a puh bawk. 

MPCC Vice President Lal Thanzara chuan, “Congress sorkar tur kuma thusawina hun hmasa ber a chan avanga lawmthu sawiin, kum 2023 hi tih palh sawrkar MNF tawp hun a ni ta,” a ti. "Mipui nawlpui zingah MNF sawrkar nawn leh ring an awm tawh lo a, anmahni party mi ngei pawhin an in ring zo tawh lo. Inthlan hma a intiamna a hlawhchham vek avangin an tan beisei tur a awm tawh lo. MNF ten sawrkarna an chelh tirh atang khan a hotu lu ber atangin Minister rualten sawrkar nawn leh tum tawh lo niawm takin a theih theihnaah sum an tham bawrh bawrh a. Ram hmasawnna tur tak tak ngaihtuah si lovin an sum hmuhna tur Contract hna an insiam a, hengte avang hian sawrkar hnathawkten a hun takah hlawh an la thei lo. An pawisa lo khawl sa an GP Fund pawh sawrkarin a pe chhuak thei lova, Contractor-te bill an batsak a, Tar pension takngial pawh an pe thei lo. 2022-23 chhungin leiba pawh cheng vaibelchhe 1119.2 a tling tawh. Heti chung hian Bible in, 'an zak lem lova' a tih angin MNF hotute hi an zak lem lo," a ti. 

MNF sawrkar chu Law & Order-ah hlawhchham tiin, "Kuhva ro tawlhruk pawh an ti tawp thei lova, Police man theih loh YMA leh Kuhva chingtuten an man daih thung. MNF Sawrkara an hotu sangte hi inrawlh lo nise Kuhva ro sumdawnna hi tih tawp a harsa lo. A inrawlha te hi Sawrkar milian an nih avangin an ti tawp hlei thei lo a ni. Sawrkar zah tlak an nih loh avangin MNF sawrkar thlah nan Kumhlui thlah zanah Aizawlah chuan mipuiin halpuah nasa takin an hal a ni," a ti.

ZPM chungchang sawiin, "Enchhin tura in zuar mekte hi an hotute mipuiin kan lo enchhin tawhte vek an ni. Mahni party din ngei pawh chhuahsan leh thin hruaitute hi enchhin zel tlak an ni lo. Pathian khawngaihna zarah dawt sawi ve ngai lo, Pathian tih tu Pu Lalsawta hruaina hnuaiah Congress Party hi ram leh hnam tana thawk turin Pathianin min tungding leh ang. ZPM-te angin anmahni hmuh tur awm lo mi tam tak kan lawmlut ve ngai lo. He kumtharah hian Kohhran-in Thlarau thara rawngbawl turin min fuih a. Keini pawh hian he kumtharah hian rilru leh ngaihtuahna thar, Pathian malsawmna dawng tlaka hma kan lak chuan Pathianin min pui ang. Mahni in dah hmasa lovin kan ram leh kan hnam, kan sakhua himna leh zahawmna, a dinchhuahna i dah hmasa ang u. Tih nuam tak leh thuawih taka kan awm chuan kan rama thil tha ei turin kan dingchhuak ang," a ti bawk.