Aizawl June 24, 2022 : Mizoram Youth Commission Chairman, Dr. Vanlaltanpuia, MLA chuan, Mizoram District hrang hranga sawrkar hmalakna hrang hrang te leh MLA bial hrang hrang dinhmun ngun taka thlirin hmasawnna chak takin thawh a ni a ti a, Nakum MLA inthlanah pawh chakna kan chan leh ngei a beiseiawm hle niin a sawi. "Kum 2023 ah pawh sorkarna kan siam leh ngei dawn a ni,"  a ti.

Vawiina Mizo Hnam Run chhung inkhawmah Dr. Vanlaltanpuia chuan,"MNF party hi a tobul a fuhin, a chi phum hi a tha em em a, kan innghahna lungphum a fuh em avangin India ram pum thlir pawhin kum 60 hnuah pawh political party ngelnghet ber te zinga mi kan ni thei a ni. Pathian leh kan ram tan titu kan nih avangin thil thleng danglam mil a kal ve ngawt thei kan ni lo. Ram neitu duhdana ram hi enkawl tur kan ni," a ti.

Dr.Tanpuia chuan, "Politics kan luh chhan hi kan chian a ngai a. Kan mihring puite leh ram leilung enkawl tura ruat kan ni a. Inbei tawn a, inchirhtheh ngawt loin thurawn inpe tawna ram kan siam a ngai a ni. Rorelna dik kan kalpui zel theih nan te, ram leilung kan enkawl danah te, mirethei zawk ngaihsak kawngah te kan zavaiin tan kan lak thar a ngai a ni," a ti bawk

MYC Chairman chuan hun engemawti atang tawhin Mizo thalaite All India Central service lama lut kan tlem tak avangin sorkar pawhin tan a la a. Kan CM zahawmtak  Zoramthanga thahnemngaihna avangin Mizoram Youth Commission pawhin nasa takin tan a la a, tih tak takna nena Central service luh tum thalaite chhawmdawlin an tan sorkar a inhawng reng a ni, a ti.