November 22, 2022; Mizoram Election Department a Jt. Chief Electoral Officer (CEO) David Liansanglura Pachuau hnen atanga ZALEN thudawn danin, vawiin thlenga Bru mi leh sa Mizoram Electoral Roll a chuang Tripura Transit Camp a cheng te zinga mi 1,815 te chu Mizoram Electoral atangin paih an ni tawh. Transit camp a Bru te hi nakum 2023 Mizoram inthlanpui neih hma ngeiin Mizoram Electoral Roll atanga paih fel hman tum a ni.

Jt. CEO in ZALEN a hrilh danin, Draft Roll buaipui a nih vanga Mizoram Electoral Roll atanga Bru raltlan, Tripura a inbengbel te paih (deletion) hna chawlhsan lailawk a nih hnuah Draft Roll tihchhuah fel a ni tawh a, tunah chuan deletion request pawh an dawng leh zel tawh turah an ngai.

Jt. CEO chuan Transit Camp a awm Bru te chu nakum Mizoram inthlanpui hma ngei a paihfel hman beisei a ni tih ZALEN hrilhin, Tripura pawh nakum kum tir lama inthlang tur an nih ve avangin an hmanhmawh ve tho a a rin thu a sawi.

Bru mi leh sa Mizoram chhunga vote nei tuna Tripura Transit Camp-a cheng mek Mizoram R-Roll atanga paih tawh te hi Mizoram chhunga District 3-a vote nei te anni a, Mamit District ah tam berin Hachhek, Dampa leh Mamit Constituency atangin vote nei 1,480 te chu paih an ni tawh a,  Kolasib District in dawtin Tuirial, Serlui leh Kolasib Constituency atangin voter 175 paih tawh niin, Lunglei District ah Thorang, West Tuipui leh Lunglei South Contituency atangin voter 160 paih an ni tawh bawk.

Mizoram Election Department chhinchhiah danin Bru mi leh sa Mizoram chhunga vote nei te hi an vaiin 11,759 an ni .