ZALEN, November 12, 2025: Mizo zinga pool khel thiam rual 24-te inelna, Ather Electric Scooter 9 Ball Pool Championship 2025 khelh mek zelah quarterfinal lut pahnih a hriat belh leh ta a, Pool B atangin PB Liansangzuala leh Laltanpuia te a thiam pariat zingah an tel veleh ta a ni.

Mizoram Snooker & Billiards Association (MSBA) buatsaih inelna hi Thawhtanni atang khan Millennium Centre Atrium, Aizawlah khelh tan niin Pool A atangin Lalrina Renthlei leh K. Lallawmkima, Pool D atangin Lalsangzela leh R Lalthazuala ten a hma ni hnih chhungin quarterfinal an lo lut tawh.

Nilainia Pool B-a mi player parukten a thiam pariat zinga tel an inchuhnaah frame nga la hmasa zawk chak (race to five)-a khelin a tawpah Pb-a leh Tanpuia an dingchang.

Ninganiah Pool C-a miten quarterfinal luh an inchuh ve thung ang a. Zirtawpniah quarterfinal an khelh zui ang a, Inrinni chawhmaah semifinal khelin chawhnuah final an khel zui dawn a ni.

Ather Electric Scooter 9 Ball Pool Championship 2025 hi ni tin chawhma dar 10:00 atanga khelh tan a ni a, a hmunah a en theih bakah Aidu Play-ah live-a pek chhuah niin a thlawnin a en theih a ni bawk.

Inelna hi a duh duh tel theih a ni lo va, a hmain MSBA Hall, Hawla Indoor Stadum-ah a khel pha tur zawnna tournament awmin player tha zual 24 chauh an inlan thei a ni.

Pool C (Nov. 13, 2025-a quarterfinal luh inchuh turte)

1. Zonuntluanga

2. T Laltanpuia

3. Jackson Lalrintluanga

4. Lalchhandama Chhangte

5. B Lalhruaitluanga 

6. R Lalmalsawma

Quarterfinal lut tawhte:

Pool A:

1. Lalrina Renthlei

2. K Lallawmkima

Pool D:

1. Lalsangzela

2. R Lalṭhazuala

Pool B:

1. PB Liansangzuala

2. Laltanpuia, Lunglei