ZALEN, Mar. 24, 2026: Mizoram State Sports Council (MSSC) Golden Jubilee 9 Ball Pool Championship 2026-ah Lalsangzela a champion.

Mizoram Snooker & Billiards Association (MSBA) buatsaih inelna final Inrinni tlai khan MSBA Hall, Hawla Indoor Stadium, Republic Vengthlang, Aizawlah khelh niin Khatla South tlangval hian T Laltanpuia, Upper Republic chu 9-4-a hnehin nomawi a la a ni.

Zela hian semifinal-ah tun thla tur lama Mizoram State Snooker Championship 2025-26 final-a a lo hneh loh tawh, Lalrina Renthlei lakah phuba lain 8-4-in a hneh a, Tanpuia hian 8-3-a Lalchhandama Chhangte hnehin final a lut ve thung.

9 Ball Pool Championship 2026 hi kar kal ta Thawhtanni atanga khelh tan niin player 112 tel zingah Aizawl bakah Lunglei, Sihphir leh Seling atanga tel an awm nual a ni.

Final hi MSSC vice president, Mizoram Chess Association (MCA)-ah senior vice president ni bawk, Dr Lalhmuachhuaka’n khuallian niin a hmanpui a, infiam mi kal khawmte chu ram dang leh hnam dang hmaa Mizoram timawitu ni tura theihtawp chhuah zel turin a chah. 

MSBA 2025-26 season kharna championship-a champion ta, Zela hi Mizo snooker player hriat hlawh ber pawl niin hnuhma pawh tha tak tak a nei a. Kum 2024 khan Mizoram State 6 Red Snooker Ranking Tournament 2024-ah pawh a lo champion tawh.

Nikum khan 91st Indian National Billiards & Snooker Championship, 2025, Indore, Madhya Pradesh a khelh-ah Lalrina nen Mizoram aiawha khelin an che tha dun viau bawk a, senior huangah chuan national championship-a Mizoramin record an neih that ber tum a ni nghe nghe.