ZALEN, November 16, 2025: Ather Electric Scooter 9 Ball Pool Championship 2025 final-ah Lunglei atanga tel pahnih zinga mi, R. Lalmalsawma’n tha taka bul tanin 2-0-in hma a hruai hman a; mahse, tawnhriat nei tha, Lalrina Renthlei lakah dingchang zo lovin a tawpah 8-3-a tlawmin Tuikhuahtlang tlangvalin nomawi a la.

Inrinni tlaia Millennium Centre, Aizawl chhuat zawl, atrium-a final-a frame riat la hmasa chak zawnnaah Sawmtea hian tha taka bul tanin 9 Ball Pool-a India No. 5 Lalrina chet hmain fram2 hnih a la hman.

Frame thumna atanga lina thlengin Tuikhuahtlang, Aizawl tlangvalin a theihna lantirin a nihrual bakah 3-2-in a lehthal a. Frame dawtah Sawmtea’n nihrual let veleh mah se Lalrina a talbuai zui duh tawh lo va, 4-3-a hma a huai hnuah Sawmtea foul leh hun pawimawha a chetsual zeuh hmang tangkaiin 6-3-in hma a hruai zui a, hawi kir tawh lovin hnehna a chang zui.

Lalrina hian nikum khan Millenium Centre-ah tho, Independence Day 9 Ball Pool Championship 2024-ah final lut tawhin Lalsangzela a hneh lo tawh a, kuminah erawh nomawi a hawn ta a. Kuminah hian semifinal-ah Zela lakah phuba lain 7-6-in a hneh nghe nghe.

Sawmtea hian semi final lehlamah PB Liansangzuala chu 7-5-in a hneh ve bawk.

Tar lan tawh thin angin Ather Electric Scooter 9 Ball Pool Championship 2025 hi a duh apiang tel theihna a ni lo va, Mizo player tha zual 24 chauh tel theihna a ni a. A hmain qualifying tournament khelh a ni a, player 130 chuang an inlan a ni.