LALNU tawrhpuina

US ram chanchina beihna lian ber an tawh champhaah hian UK lalnu, Queen Elizabeth pawhin thu thawnin a tawrhpui thun a hrilh.

Queen Elizabeth hian Biden-a hnenah hian kum 2010-a World Trade Center a tlawh thu leh chu chu tunah hian a hriat thar leh thu a hrilh.

“Ka rilru leh ka tawngtaina chu beihna thlenga a tuartu, dam chhuak leh an chhungte leh ram pum tan a awm reng a. A hmun thleng hmasaa chhanchhuah hna thawktute zawng zawng pawh rilruah a awm reng a ni,” a ti.

9/11 attacks-ah khan thi zinga mi 67 chu Briton an ni.

UK Prime Minister Boris Johnson pawh kha beihna khan zalenna leh mipui rorelna rinngamna chu a sawi chhe zo lo tih a sawi.

United States President Joe Biden chuan September 11, 2001-a an ramin beih a tawh champhaah an ram mipuite chu inpumkhat tlat turin a sawm.

9/11 attacks champha kum 20-na thlen hma lawka video a tihchhuahah an ramin beihna a tawha thi, mi 2,977 zette chu hriat reng an nih thu a sawi.

“Kha thil thlen lai, a hnu darkar, thla leh kuma an nunna chân leh hlauhawma ding zawng zawngte kha zahna kan hlan a ni,” tiin Biden chuan a sawi a. Kha thil thlenga rikrum thil thlenga thawk chhuahte a fak bawk.

Inrinni (India sanaa zan lam atangin) he hun hriat rengna hun hrang hrang hman a ni ang.

Biden-a hian an ram sanaa zing dar 8:30 (India-a tlai dar 6:00)-ah New York-a World Trade Center Twin Towers pahnih dinna hmunah hun a hmang tan.

Hun a hmanna hrang hrangah hian thu a sawi vak dawn lo va; mahse, Zirtawpnia thuchah a sawiah erawh, “Hun tam pawh liam sela, he hun kan hman hian hrehawm tihna min thlen a ni,” a ti.

A thuchah sawiah hian beih an tawh hnuah khan mihringa a thim lam sipai - hlauhna leh thinrimna leh Muslim American huatna nasa tak a inlar zui tih  a sawi a, “Mahse, inpumkhatna hi US-in chakna a neih ropui ber a la ni reng,” a ti.

“Inpumkhatna hi tihchhiat ve theih loh a ni tih kan zir chhuak a ni,” a ti bawk.

US ram chanchina beihna lian ber hi Afghanistan-a inkulh, al-Qaeda firfiak pawlin an ruahman niin US passenger phur thlawhna pali chu hruai kawiin pahnih chuan Twin Towers hi thihchilhin an su chim a ni.

Thlawhna dang pakhat chuan an khawpui, Washington DC-a Pentagon a su a. Pakhat dang leh hi a hruai kawitu chu a chuangten an beih avanga a tum anga che thei lovin Pennsylvania-a lovah a tla thung.

President Biden-a hian a nupui, Jill nen beihna thlenna hmun pathum hi an tlawh vek dawn.

World Trade Center tower pahnih sut leh a tlukna hmun, Pentagon leh Flight 93 a tlakna hmunah hian vawi ruk ngawi renga hun hmanna hun a awm ang.

Tuna 9/11 attacks champha hi president tan chuan hun khirh tak a ni a. Beihna an tawh avanga Afghanistan-a firfiak pawl chhu chimit tura an luha kum 20 dawn an awm chilh hnuah, tun hnaia an chhuahsan leh Taliban-in an thunun zui lehnghal mai bawk si avanga dem a hlawh mek lai a ni.

Biden-a hian beih an tawh kum 20-naah Afghanistan an chhuahsan dawn thu a sawi lawk a, Taliban-in an thunun zui a rinawm loh thu a sawi a; mahse, an chhuahsan tan atanga ni 10 pawh tling lovah helho hian ram pum an thunun zui leh ta mai si a ni.