September 9, 2022; Aizawl Smart City Projects Ltd. (ASCPL), UD&PA department hnuaia thawh tur, Aizawl Bazarpui (New Market) a building sak tur, 'Aizawl City Centre' leh Commerce & Industry department in 'Aizawl City Centre Annexe building' (Foreign lane building thin) chu hun tiam chhunga sak zawh a ni lo.

Assembly session neih zawh tak a C. Lalsawivunga zawhna Commerce & Industries changtu Dr. R. Lalthanglianan a chhan danin, Aizawl bazarpui (New Market) building chu ASCPL, UD&PA hnuaia thawh tur niin, 'Aizawl City Centre' tih a ni a, Commerce & Industries department chuan 'Aizawl City Centre Annexe building,' tun hmaa foreign lane building thin sak that hna a thawk mek bawk.

Aizawl City Centre Annexe buildig sak hun chhung chu thla 36 (kum 3) kum 2019, October atanga kum 2021, October a ni a. Tun thlengin physical achievement 32% ni tawhin, financial achievement Rs. nuai 1,050 (28.8%) a ni tawh.

Hun tiam chhung a sak zawh a nih loh chhan minister in a tarlan te:

• Market building a eizawng ten sawrkara an ngen angin, December ni 31, 2018 thleng thut tir leh an ni a, hei hian building thiah turah harsatna a siam.
• Building awmsa thiah hmasak a ngaih avangin sak mai theih a ni lo.
• Geotechnical Investigation chu building thiah hnuah chauh hmalak theih a nih avangin hun a tikhawtlai.
• Building sakna tura lei laih (earthwork) chu khawpui lun lai a nih avangin zan lamah deuh chauh thawh theih niin, hei hian hmalak a ti khaihlak.
• Lockdown avangin hna a thawh mumal theih loh a, labour leh material pawh hun rei tak a khaihlak a, chu chuan building sak hna a ti muang.