Hmanni chu Zofate zinga union minister hmasa ber leh a awm chhun, Dr C Silver-a chanchin ka chhiar a, chu lehkhabu ka chhiar zawha ka rilrua awm vang vang chu ‘hlawhtling tur hian mi fate hian an lo va bei nasa em! Vanneihna leh malsawmna dawng tur hian a man an lo pe nasa mang e’ tih hi a ni.

Dr. C.Silvera hian, “Ka lehkha zir ang khan tupawhin zir se hlawhchham an awm ka ring lo,” a ti tawp mai. MBBS a zir duhna ber CMC Vellore-ah seat a chan ngei theih nan zir patawkin a zir a, “Ka khum bul bang zawng zawng pawh mu chunga chhiar theih turin ka ziak khat tlat a ni,” a ti tawp mai. A beih ngawrh tum phei chuan khumah pawh a mu ngai meuh lo. “Ka chair chu ka khum a ni mai a, ka mutchhuah tawpah ka chair-ah chuan ka lo muhil a, ka harh hun hunah ka chhiar leh mai,” ti khawpin a zir nasa a ni. Chutiang khawpa thawk rim leh bei nasa chuan CMC Vellore-a MBBS zir chu a phu hliah hliah mai. A phu ang ngeiin a zir ta reng a. Chu mai ni loin Zofate zinga Union Minister ni thei hmasa ber a ni ta hial mai.

Mi tam tak chuan vanneihna leh malsawmna te, hmingthatna te hi kan thlahlel lo bik pawh a ni lo. Mi hlawhtling te hi kan awt lo pawh a ni lo. Chutiang tur chuan thawhrim a ngai a, beih hram hram a tul a, a man pek a ngai a, chutah tak chuan kan tla leh mai thin.

Mi ropui tura piang emaw, hlawhtling tura duan bik tumah kan awm chuang lo. A thawkrim piang, a bei talh talh apiang, a zir nasa apiang, a chhiar zau apiang hi an hlawhtling mai a ni. Khawvel pum huap pawha football thiam hmingthang, free kick pet thiam em em mai Cristiano Ronaldo pawh hian a thiamna (telent) ti pung tur hian a thawk rim khawp mai. Ni tin an inkhelh karlakah training hautak tak an nei ziah a. An training zawha a thian (team mate) te an haw vek hnuah darkar khat dawn te amahin freekick pet a zir ngat ngat thin an ti. Chutiang taka zir nasa leh thawkrim a nih avang chuan free kick pet chu a thiam ta reng a, free kick pet tur a awm chuan a thian te pawhin an pa pek chawt mai thin. Kual mawi taka free kick pet tur hian vawi tam a lo bei chhin tawh a, thlan tui tam tak a seng a, a teirei peihna chuan free kick pet thiamah a chhuah ta mai a ni. A phu teh e!

Sawi tur a tam ang. Vawinna sumdawng hausa leh hlawhtling kan tihte pawh hi tlawm tea bul tan an ni deuh vek mai. Cheng hnih khat leh hlep tur pawhin mi aia hmain dawr an hawng peih a, mi aia tlaiah an inkhar leh a, an bei fat fat a, zawhte tiat leka bul tan kha a tawpah sai tiat an lo ni ta mai a ni.

• K. Lalrinchhana