Aizawl June 23, 2024 : Mizoram sawrkarin health care scheme thar, Mizoram Universal Health Coverage Scheme (Mizoram Universal Health Care Scheme) hman a tum chu a takin kalpui a la ni lo a, hemi vang hian health care scheme pangngai awmsa hman a la ni.

Mizoram State Health Care Society (MSHCS) hotute hnen atanga ZALEN thudawn danin Mizoram Universal Health Coverage Scheme hmang turin a tul ang ang buaipui mek a ni a, hman thuai a nih theih nan chak taka hmalakna kalpui mek a la ni.

He scheme thar hi a taka kalpui a nih hunah chuan damloten Rs. Nuai 5 thleng an inenkawlna man an bill thei dawn a. Tuna hman mek, Mizoram State Health Care Scheme (MSHCS)-ah chuan Rs. 2,00,000 thleng bill theih a ni.

Kumin February 8-a thuthar thehdarhtute a kawmnaah Health Minister Lalrinpuii chuan damloten anmahni pawisa seng lova damdawi ina an inenkawl theihna tur health care scheme thar, Mizoram Universal Coverage Scheme duan a nih thu leh cashless system-a kalpui tum a nih thu a lo puang tawh.

Health minister chuan Mizoram health care scheme thar tur an duan chu Rs. Nuai 5 thleng bill theihna a nih tur thu te, chumi atan chuan uluk takin sum hmuhna tur te, sum hman dan tur te, bill theih chin leh rate hrang hrang bithliah tur chin zirchian mek a nih thu te a lo sawi tawh bawk.

Health minister hian May 20, 2024 khan an party, ZPM office-ah thu sawiin mipuiten an damloh thulha Rs. Nuai 5 thleng man chawi lova an inenkawl theihna tur health care scheme thar, Universal Health Care Scheme chu a taka hman theih tura buaipui mek a nih thu a puang nawn leh a, department hotute nen tum eng emaw zat an sawi ho tawh thu te, a taka hman theih thuai beisei a nih thu te bakah, health care scheme thar chu mipui huapzo tura duan a nih angin Universal Health Care Scheme tia vuah a nih thu te a sawi.