Ecuadorean gang hruaitu thin ruang chu Colombia thlanmuala an phumna atangin a bo tih police-in an sawi.

Junior Roldán-a hi a ruang tumahin an hlawm loh avangin Envigado khuaa banga ker thlanah zalh a ni.

Tan ina mi sual pawl lian lian tak, Ecuador-a tharum thawhnaa nasa taka inhnamhnawih, Los Choneros-a an hotu ber dawttu ni thin hi May thla khan Colombia-a Antioquia province-ah thah a ni.

A pianna, Ecuador-ah hian vawi hnih thah tumna laka a him hnuah Colombia-ah hian a tlanchhe zui a ni.

A ruang hi May 6-a thing hmuna chhar niin a lu-ah silaia kahna hnuhma a awm.

Police chuan amah vengtu (bodyguard)-in s um leh pai kente a it avangin a that ta a nih an ring a, tumah a thattua puh man zui erawh an la awm lo.

A tattoo atangin amah a ni tih finfiah a ni a, May 18 khan Medellín chhim lam hreta thlanmualah hian vui a ni.

Thawhlehni khan thlanmuala thawktuten gate inhawng an hmu a, a chhung an han en chian chuan thlan pakhat a kua tih an hmu ta a ni.

A hnuah thuneituten an chik chuan Junior Roldán-a thlan ngei a ni tih an hre chhuak ta a ni.

Police chuan mipa eng emaw zat thlanmualah hian kalin thlan hi an hai ta nia an ngaih thu thuthar lakhawmtute an hrilh.

Engvanga gang leader ruang hi duh nge an nih tih leh a titute rin thiam an la neih loh thu an sawi a. Roldán-a hian hmelma erawh tam tak a nei tih an sawi.

Ecuador atanga a tlanchhiat hma pawh hian an elpui gang, Los Lobos (The Wolves) intite chuan an kap hliam.

Hemi hma, lung ina a awm lai pawhin amah an dahna lai pindan chu drone-a puak theih danin beih a lo ni tawh bawk.

A telna, Los Choneros pawh hi ruihhlo tawlh leh mi thil leh sum chhuhsak lamah an tal nasa hle thin.

An mite zinga thahnem tak lung ina dah an nih hnuah pawh Ecuador-a prison gang thiltithei ber an ni zui a, an rama lung in tam tak thununin pawn lamah an pawl chet lakna pawh thui tak an la thunun phak bawk.

Lung in chhunga pawl leh pawl intihbuaina tam takah pawh Los Choneros hi a bultumtu nia ngaih an ni a. Hetiang intihbuainaah hian mi tang tam tak thiin thenkhat phei chu an lu tansak hial an ni.

Tun hnaiah phei chuan Mexico-a Sinaloa cartel nen an inzawm thuk deuh va, hei hian an thiltihtheihna a tichak lehzual hle bawk.