Mizoramah a thlawna thisen pe an tam chhoh viau tawh laiin tun hnaiah a tlahniam a; mahse, nikum atangin san lam a pa leh. Nikum April 2018 atanga March 2019 inkar chhung khan Mizoram hmun hrang hrangah thisen unit 27079 lak a ni a, heng zinga 86.54% hi mi tlawmngaite pek (voluntary) a ni. Mizoram State AIDS Control Society chhinchhiah danin kum kalta chhunga thisen lak unit 27079 zinga unit 23434 hi mi tlawmngaite pek a ni a, unit 3645 chu rulh leh ngai (replacement) a ni. Mizorama blood Bank 10 awm zingah Civil Hospital, Aizawlin thisen an la hnem ber a, unit 14027 lain heng zinga 12471 chu mi tlawmngaite pek a ni a, mi tlawmngaite pek hi thisen pe zat atanga chhutin 88.91% a ni. Civil Hospital, Aizawl dawtah hian Synod Hospital, Durtlang tana pek chu a tam ber a, Durtlang hian unit 3099 an la a. District hospital danga thisen lak/pek dan chu Champhai unit 1335, Kolasib 1176, Lunglei 2317, Serchhip 1085, Lawngtlai 1290, Saiha 1002, Mamit 360 leh Christian Hospital, Serkawnah unit 1388 te a ni. Kum kalta chhung vek khan blood donation camp hi tum 458 huaihawt niin heta tang hian thisen unit 18653 lak a ni. Zalen palai thudawn danin kum 2012-13 chhoa a thlawna thisen pe 94% chuangte a kai chhoh lai leh a thlawna thisen pekin hma a sawn zel laiin sawrkarin a sawngbawlna man (processing fee) a lak avanga hriatthiam lohna a awm avangin a thlawna thisen pe hi an tlahniam chho tan a, voluntary blood donation hi 100% hial kaichhohtir tum a nih laiin 75%-ah a tla thla hman hial a ni. MSACS thawktute chuan Mizoram chu India rama a thlawna thisen pek tam lamah top 10-ah a la awm tih sawiin hmarchhak state-ah chuan Tripura leh Arunachal Pradesh te chu a sang zingah telin 100% a thlawna thisen pe angin tar lan a ni an ti a. Mahse, heng state-te ngaihtuah hian Mizoramah chuan thisen pek a tam filawr hle tih sawiin Mizoramah unit 27000 chuang te pek a nih laiin Arunachal Pradesh-ah chuan unit 5000 vel chauhte lak a ni tih an sawi bawk.