Japanese Prime Minister Fumio Kishida chu a hun hmanna, Wakayama lawngchawlh hmuna thil puak a awm avangin rang taka insasengtir a ni a, a him niin tual chhung chanchinbute chuan Inrinni khan an tar lang.

Kyodo news agency leh chanchinbu dangten an tar lan dan chuan ‘smoke bomb’ vawm puah a ni a; mahse, tumah inhliam emaw, thil chhia emaw a awm lo nia hriat a ni.

NHK chuan Japan khawthlang lam, Wakayama-ah hian Kishida hi thu sawi tur a ni tih a puang a. He thil thlengah hian mi pakhat man a ni tawh bawk tih an sawi.

Prime minister hun hmanna tura thil thleng hi sorkar chuan engmah a la sawi lo va, tual chhung police pawhin engmah an la sawi rih lo bawk.

NHK-in video a tihchhuahah chuan mi zi nuaih nuaih karah venhim hna thawktu leh police-in mi pakhat an man lai a lang.

Japan-ah hian July, 2022 khan prime minister hlui, Shinzo Abe chu an party tana a campaign-naah kah hlum a ni a, hemi hnuah hian venhimna tihkhauh zual a ni.

Japan hian hmar lama Sapporo leh Nagano-a Karuizawa khawpuiah G7 ministerial event a thleng dawn a, May thlaah hruaitute intawhkhawm pawh Hiroshima-ah a thleng ang.