July 24, 2023; Tukin zing dar 9:30 vel khan damchhung tang tura court in hremna a pek tawh, a unaupa thattu Tunsianmuanga (41) s/o Lalthianghlima, Hnahlan (Life convict) chu Champhai district jail atangin a tlanchhuak a, he thu ziahlai (5:00pm) thleng hian a chin hriat a la ni lo.

Champhai district jail thawktute hnen atanga ZALEN thudawn danin, sanitation motor in jail chhung hnawm hnawkte paih tir thin a ni a, tukin ah motor hi kalin, jail chhung a bawlhlawh an dahkhawm te gate ah an la chhuak a, Tuansianmuanga hi bawlhlawh kengin a kal ve a, gate a chhuah chiahin a tlan nghal a, chin hriat loh in a awm zui nghal a ni.

A tlanchhuak tih hriat a nih ve leh theihtawp chhuahin zawn nghal a ni a, tun thlengin a chin hriat a la ni lo. Champhai police station ah FIR thehluh tawh a ni.

Tuansianmuanga hian kum 2021, June ni 23 khan a unaupa chu Bawngtuthlawh hmangin a vaw hlum a, a thubuai ngaihtuah a nih hnu-ah July ni 20, 2023 khan Champhai Addl. District & Session Judge chuan thiam loh chantirin, dam chhung a lung in tang tur leh Rs. 5,000 chawi turin a hrem a ni.