Canadian pop star Justin Bieber chu a vawi hnih nan India-ah a lo kal dawn a, October 18 khian New Delhi-ah a concert dawn. Kum 28 mi Justin Bieber hian May 14 atang khan 'Justice World Tour' a nei tan a, ram hrang hrang a tlawh tur zingah India pawh a tel tihna a nih chu. 

'Baby' hitmaker hian kum 2017 khan 'Purpose World Tour' a neih tumin India a lo tlawh tawh a, Mumbai-ah concert a nei. Hemi tum hian amah ngaisangtu mi 40000 chuang an pung khawm a, kuminah chuan New Delhi-ah concert ropui a nei ve leh thung ang. India-a amah chah luttu turte hi AEG Presents leh Indian entertainment ticketing platform BookMyShow te an ni. 

'Justice World Tour' a neih chhung hian ram 30 chuang a tlawh dawn a, khawpui hrang hrangah show vawi 125 chuang a nei ang. Tour hi Mexico atangin bul a tan a, nakkum March thla thleng a awh ang - kum khat chuang zet a tour dawn a nih chu. He tour hi T-Mobile ten an promote niin, North America leh Europe bakah South America, South Africa leh Asia khawmualpuite a tlawh dawn a ni.

A tak ngeia Justin Bieber hmu duh tan ticket ngaihven nghal a fuh ang. June 4 atangin BookMyShow-ah an zuar chhuak dawn a, 
Rs. 4,000 vel atangin a intan dawn a ni.