Jeremy Lalrinnunga chu India ram pum inelnaaah rit chawitu (lifter) tha ber, Best Lifter atan thlan a ni leh ta a, he chawimawina hi a vawi hnih dawnna a ni ta.

Kum 21 mi, Jeremy-a hian Itanagar, Arunachal Pradesh-a December 28 atanga Pathiannia zawh tak, Indian Weightlifting Federation (IWLF) buatsaih National Weightlifting Championship 2023-2024-ah Senior (Men) kg 67 huangah Snatch-ah kg 136 leh Clean & Jerk-ah kg 162, a vaia kg 298 chawiin gold medal a la a, best lifter atan hian thlan zui a ni.

Best Lifter chawimawina hi Ainawn Veng tlangval hian Kolkata, West Bengal-a Senior National Championship 2020-ah khan a lo dawng tawh a. Hemi tum pawh hian Mizoram tan kg 67 huangah gold a la a, national championship-ah senior huanga goal a lak hmasak ber a ni nghe nghe.

Senior national championship-ah hian Kolkata leh tun tum bakah hian Patiala, Punjab-a kum 2021-ah pawh khan Commonwealth Games 2022 gold medalist hian gold tho a lo la tawh bawk a, hemi tum erawh chuan Services hmingin a chawi thung.

Kuminah hian Mizoram atangin rit chawi chak 15 leh official pathum an kal a. Jeremy-a bakah hian Youth Championship (Men) kg 81 huangah Lalruatfela chuan a pum puiah kg 280-a rit chawiin silver medal a la bawk.

Bungzung tlangval, Commonwealth Youth Games gold medalist lo ni tawh hian Snatch-ah kg 125 leh Clean & Jerk-ah kg 155 chawiin a vaiin kg 280 a chawi a. Maharashtra rit chawi chak, Sairaj Pradeshik (Snatch - kg 133 & Clean & Jerk - kg 161, total - kg 294) a tluk phak lo.

Mizoram tan hian Jeremy-a leh Ruatfela’n medal an thawh chhuah rualin Mizo rit chawi chak, Army Sports Institute (ASI) atanga inzir chhuak, Lalhunthara chuan Services hmingin Senior (Men) kg 67 huangah tho Snatch-ah kg 121 leh Clean & Jerk-ah kg 163, a vaiin kg 284 a chawi a, bronze a la bawk.

Tun tum championship-ah hian Mizoramin medal pahnih chauh la phak mah se Youth huanga inelna kaltlang hian January 19-31 chhunga Chennai, Tamil Nadu-a Khelo India Youth Games neih turah lifter panga an tlin phah tho.

Khelo India Youth Games-ah hian mipaah Isak Malsawmtluanga (kg 61), Lalruatfela (kg 81), David Lalzawmdika (kg 96) leh David Zohmingmawia (kg +102) leh hmeichhiaah Cindy Lalparmawii (kg 76) te an inlan thei dawn a ni.