ZALEN, November 19, 2025: A vawi khat nan Mizoram chuan ram pum huapa team inelnaah a vawi khat nan champion nomawi lain Arunachal Pradesh-a Yonex-Sunrise 48th Inter State - Inter Zonal & National Junior Badminton Championship 2025-ah boy’s team chuan final-ah 2-1-a East Zone champion, Delhi hnehin an champion.

Badminton Association of India (BAI) hnuaia zone panga awma champion theuh leh inelna thlengtute inelna thinah hian Mizo rawltharte hi North East Zone champion an nih avanga inlen phak an ni.

Seeded No. 2 niin West Zone champion Chhattisgarh leh East Zone champion Uttarakhand inkhela a chak zawk, Chhattisgarh nen final luh inchuha an inkhelhah 2-1-in hnehna an chang hmasa.

Semi final-ah Chhattisgarh nen intum in, 2-1 in an lo chak tawh bawk a ni.

Nilainia final khelhah Mizoram tan first singles-ah H. Lalthazuala lutin Vansh Dev lakah 21-15, 21-19-a hnehna changin hma an hruai nghal a. Doubles-ah C. Lalramsanga leh Sainunmawia Sailo te lutin Param Chaudhary leh Bhavya Chhabra te tangdun lakah 17-21, 22-24-in an tlawm a, 1-1 niin reverse singles-in a champion zawn a ngai zui.

Mizoram tan Ramsanga lut lehin Delhi tan Manthan Bobal a khel ve thung a, 21-10, 11-21, 21-15-in Durtlang rawlthar chuan hnehna changin Mizoram team-in 2-1-in champion nomawi an chang a ni.

MIZORM TEAM: 

1. H. Lalthazuala, Chanmari West, Chanmari Shuttlers Club

2. C. Lalramsanga, Durtlang, Mission Veng Badminton Club

3. Sainunmawia Sailo, Ramhlun Venglai, Sihphir Badminton Club 

4. Malsawmhlua, Serchhip P&E Veng, New Serchhip Badminton Club 

5. Vanlalmalsawmzuala, Serchhip, New Serchhip Badminton Club 

6. Vanlalpekhlua Sailo, Serchhip, Chaltlang Badminton Club 

7. Vanlalhruaia Sailo, Serchhip, Chaltlang Badminton Club 

Manager: Dr Malsawmkima, Mission Veng 

Coach: Lalhlimpuia, Mission Veng