Aizawl July 29, 2023 : Aam Admi Party Mizoram chuan Parliament Monsoon Session 2023 neih mek a, Bill No.80 of 2023, The Forest (Conservation) Amendment Bill 2023 (A Bill further to amend the Forest Conservation Act 1980) Dân thar chu July ni 26.7.2023 (Nilaini) a India ram rorelna sang ber Parliament (Lok Sabha) in a pass chu Mizoram tan leh Mizo mipui te tan Dân thalo, ram dinhmun tiderthawng thei leh Mizo mipui te tan a him lo tak a nih avangin, Forest Conservation Amendment Bill 2023 hi Aam Admi Party Mizoram chuan a do dal nghal tih an thuchhuah siamah an tarlang.

AAP Mizoram chu he mi chungah hian July ni 27.7.2023 (Ningani) khan Delhi-ah kal nghal in, Delhi ah central Aam Aadmi Party hruaitute nen Meeting an nei ho a, vawiin hian Delhi CM Arvind Kejriwal hmuh leh an tum a ni.

AAP chuan, "Forest Conservation Amendment Bill 2023 ah hian kan ram himna leh a mi cheng te dinhmun tiderthawng thei thil tam tak a awm a. He FCA Bill hi Bhupender Yadav, Minister EF & CC chuan ni 29.3.2023 khan Lok Sabha ah a pulut (introduce) tawh a. FCA Bill draft hi ni 20.7.2023 khan Parliamnetary Joint Committee chuan an pawm a. Ni 26.7.2023 ah India ram rorelna sang ber chuan he dân hi a passed ta a ni," an ti.

Bill tih danglam a nih dan sawiin, "He Bill hian Preamble a rawn nei thar a, Forest Conservation Act kan lo tih thin kha "Van (Sanrakshan Evam Samvardhan) Adhiniyan" tia thlak a ni a. Forest Conservation Act (FCA) 1980 ah kha chuan India hmarchhak State-5 a ramngawte min humhalh sak tha hle a.Forest Area te non-activities atana hman an nih dawn chuan phalna lak tur leh paltlang ngai tam tak a awm a nih kha. Forest Conservation Act ,1980 in ramngaw min humhalh sakna ber Section 2 chu tidanglamin,FCA Bill 2023 ah Section thar pahnih 1A leh 3C te dalh belh a ni," tiin.

Forest Conservation Amendment Bill 2023 hi Mizo te tan a him loh thu sawiin, "Section 1A sub-section (2) clause (c), ah chuan, he Bill hi International boundary atanga boruak mela teha 100km huam chhungah,State Special Provisions  te rawn lo in,Forest Clearance lak ngai lo in Central in a hman tur a ni a. 100km bialin a huam chin chhungah chuan thuneihna kan nei thei dawn lo a ni. Central in Sipai hmunpui, relkawng leh kawngpuite, Industry adt. ah a hmang thei dawn tihna a ni.International Boundary atangin Mizoram hi 100km huam chin kan teh chuan, Mizoram pum a huap deuh thaw a, him chin avang hle," an ti. 

Heng bakah hian Forest Conservation Amendment Bill 2023 hian Mizoram inhumhalhna dan, Article 371G te, Inner Line Regulation a inhumna ILP te, The Scheduled Tribes and Other Forest Dwellers (Recognition of Forest Right) Act,2006 in eizawngtu Tribal min humhalhna te, Compensatory Afforestation Fund Act, 2016 te chu tibo in, Ram himna leh Mizo mipuite himna tiderthawng thei a nih avangin Aam Admi Party Mizoram chuan a tawp thlengin an do dal tlat dawn tih an sawi.