ZALEN August 22, 2023 : Aam Aadmi Party Mizoram chuan Zu chungchang ngaihtuah a pawimawh an ti a, Zu avangin Mizo thalai ten an tuar nasa an ti. Damdawiin leh doctor te atanga an thudawn atangin zu avangin medical case a tam an ti a, thihna tam zawk pawh zu kaihhnawih niin an hria. Chutihlaiin Dan fel tak hnuaiah zu zawrh ngam an duh.

AAP Mizoram chuan, "Zu khap burna hman mek, The Mizoram Liquor (Prohibition) Act 2019 hnuaiah hian zu a tam hle a. Ualau takin lei tur a awm, kan zu hmuh theihte hi zu chhe ber chi emaw tih mai tur a ni. Zu hi khap anih chuan sawrkar hian a khap rem ngei tur a ni. Hetiang hnihne a khap ai chuan sawrkar hian hlauh neilo leh dan fel tak hnuaiah Mizo ṭhalaite tan zu hi zuar ngam zawk rawh se, tiin kan ngen a ni," an ti. 

AAP Party chuan an hmalakna tur leh Kuthnathawktute zu hmanga puih theih an nih theih dan sawiin, "Rorelna dawhkan kan chelh a nih ngai chuan Industrial policy hnuaiah Mizo buh leh heng thei hrang hrang, Lakhuihthei, Dragonfruit, Balhla, Kawlthei, Fu, Sawhthing te hmangin Mizo zu chi hrang hrang, wine leh beer te dan fel tak hnuaiah siam a ni ang. Hei hi kut hnathawk tute kan khai chhuah theihna Policy pawimawh tak pakhat a ni dawn a, Mizoram pawn thlenga hralh chhuah tlak (export quality) khawpin hma kan la dawn a ni. Hei hian thalaite leh kut hnathawk tute nasa takin a chawi kang dawn a, Tourism thlenga Mizoram tan sum tam tak siamna a ni dawn bawk a ni. India leh Foreign Made Liquor chungchangah erawh chuan mipui-ah opinion poll kan la thung ang. A duh tam zawkna chu sawrkar in a kalpui dan tur a ni ang," an ti.

"Zu avangin Mizoram mipuite’n abik takin mizo thalai ten kan tuar nasa. Tunah hian Aizawl hmun hrang hranga Damdawiin te leh Doctorte kan zawh kualna ah, tunhnai a medical case awm zing a a tam zawk, a bikin mipa chu Zu vang a nih thu kan dawn bakah, tunhnaia thihna tam zawk chu zu kaihhnawih natna avanga tih an nih hial an ring a ni," an ti.

Mizoram AAP chuan zu chungchangah hian inzirtina tha mizote hian kan mamawh hle in kan hria a, he mi tura tan hian Kohhran te Zirnain leh NGO te tangrual a zu chungchang ah zirtirna tha kalpui turin kan ngenin kan sawm a ni.