Aizawl April 28, 2023 : Vawiin khan Aam Admi Party (Mi Naran Pawl) North East incharge Rajesh Sharma chuan Aizawl Press Club-ah thuthar thehdarhtu te a kawm a, Mizorama sawrkar hnathawk ten Old pension scheme an duh tih a hriat thu leh an sawrkar chuan tihhlawhtlin ngei an tum tih a sawi.

Rajesh Sharma chuan, "Mipui tana hna thawk turin kan ding a, state kan nih tirh atanga thawh daih tawh tur, la thawh si loh hna pawimawh kan rawn ngai pawimawh dawn a. Zirna lam leh hriselna lama nasa taka hma sawn turin hma kan la ngai, eirukna laka fihlim sawrkar nei turin hma kan la dawn. Mizorama sawrkar hnathawkte ngei ngei pawhin old pension scheme hi an duh vek zawk a ni tih kan hria. NPS hi paih thlaka OPS hman leh hi kan duh pui tak zet a ni. Punjab-ah chuan AAP sawrkarin hei hi a tihlawhtling der tawh a, Mizoram-ah pawh Old pension Scheme hi tih hlawhtlin ngei kan tum a ni," a ti.

AAP Hmarchhak enkawltu chuan, "Ram leh khawtlang hruaitute leh chanchinbu mite kan kawm hnuah leh Mizoram chhunga zirchianna (survey) neih hnuah Mizoram mipuite hian kan rama eirukna leh dik lo taka rorelna hi an kham tawh hre tih kan hria. Mipuite hian danglamna an duh tawh a, politics danglam leh rinawm zawk an beisei. Aam Admi chuan ram pum hmuh turin sawrkarna tha leh rintlak a lantir a, zirna lamah leh hriselna lamah nasa taka hmasawnna thlein Arvind Kejriwal chuan mipuite hmuh turin danglamna a thleng thei a ni tih a lantir. Delhi khawpuiin danglama a hmuh theih chuan Mizoram pawhin danglamna kan hmu thei dawn lawm ni?," a ti.

AAP te hian tun tum Mizoramah inthlanah din ngei an tum a, a tam thei ang ber candidate neih an tum tih an sawi a, tunah hian candidate tur mi 20 an hmuh tawh thu an sawi. An party chu thubuai nei lo, corruption laka fihlim tan zawm theih reng an nih thu an sawi bawk. AAP te hian AMC Area chhung bial pali, South I, South II, South III leh West III-ah te Block an din tawh a ni.