Aizawl June 9, 2023 : Mizorama Sawrkar Sikul tlawh kual mek AAP Mizoram chuan Sawrkarna chelhtute’n zirna a tha an tih thin chu a hmuna kal ten an hrethiam loh thu an sawi a, eng angin nge zirna tha an teh tih hi an hriat duh thu sawrkar an zawt a, sawrkar sikula lut naupang tam zawk chu future nei lo niin an ngai.

AAP Mizoram Vice President C. Lalkhuma chuan "Tuna kan sawrkar sikulte hi neitu nei lo ang mai in an kal mek a, zirna In a chhiat em em rualin zirna quality pawh a chhe hle a ni," a ti. "Sawrkarna chelhtute’n zirna a tha an tih chhan hi a hmun a kal ngei ten kan hrethiam lo a, eng angin nge zirna tha an teh tih hi kan hre duh a, a changtu Minister emaw a bialtu MLA-te hian kum tin sawrkar zirna in hi vawi 2/1 tal pawh tlawh se hma kan sawn phah ngei ang," a ti bawk.

AAP Vice President chuan, "Sawrkar Sikul a lut naupang tam zawk hian future an neilo a, nakin lawk a kan ram chawk buaitu an la ni thei tih kan hriat a tul a ni. Mizoram-a naupang awm zawng zawngte zirna tha pek hi sawrkar mawhphurhna a ni a, hun tlemte an neih chhung ngei hian he an mawhphurhna hi hlen ngei turin sawrkar kan phut tlat a ni," a ti. 

AAP chuan, "Tuna kan MLA neih zingah kum-1 a an MLA fund atanga zirna lama nuai 15 aia tam hmang mi pakhat chiah a awm a, hei hian tuna kan ram hruaituten zirna an ngaihthah zia a tilang chiang em em a ni," an ti.  

Zirna siam that theih nia an hriat thu sawiin, "Tunah hian kan hma a sawrkarna chelh tawh ten a zirna an ngaih pawimawh loh rah kan tel mek a. Thalai hna neilo leh ruihhlo ngai an tam chhan pawh tunhma a zirna kan ngaihthah vang a ni. Hetiang reng a Mizoram a kal hi keini AAP chuan kan phallo a, kan sawrkar a nih chuan Delhi Education Policy hmangin Mizoram a Zirna kan siamtha ang," an ti.

AAP Mizoram te hian tun hnai khan Aizawl South III leh Serchhip District Sikul thenkhatte an tlawh a, zirna an ngai pawimawh thu leh ram hnuk khawih thil a nih avangin ram hmasawnna atan a pawimawh berte zing a mi a nih avangin Mizoram a chengten ngaihven tul an ti.